Home / News / अन्तर्राष्ट्रिय / बम विस्फोटका लागि महिला र बालिकाको प्रयोग गर्दै बोको हराम

बम विस्फोटका लागि महिला र बालिकाको प्रयोग गर्दै बोको हराम

साउन २ । नाइजेरियामा आतङ्क सिर्जना गरिरहेको समूह बोको हरामले हालैका दिनहरुमा बम विस्फोटका लागि महिला र बालिकाको प्रयोग गर्ने गरेको छ । सो समूहले महिला र बालिकालाई अपहरण गर्ने र उनीहरुलाई नै बम विस्फोटका काममा प्रयोग गर्ने गरेको बताइएको छ । ग्रामीण क्षेत्रबाट त्यस्ता सर्वसाधारण महिला तथा बालबालिकालाई अपहरण गर्ने गरेको र लामो समयसम्म उनीहरुलाई नियन्त्रणमै राखी पछि उनीहरुलाई नै यस्ता कार्यमा जबर्जस्तीप्रयोग गर्ने गरेको पाइएको छ ।

अधिकारीहरुले पछिल्ला वर्षहरुमा उक्त समूहले आतङ्ककारी क्रियाकलापहरुमा पनि बालिकाको प्रयोग गरेको पाइएको बताएका छन् । बोको हरामले सन् २००९ देखि सुरु गरेको हिंसात्मक गतिविधिका कारण कम्तीमा पनि १५ हजार सर्वसाधारणको मृत्यु भइसकेको छ। कम्तीमा पनि १५ लाख मानिस घरबारबिहीन भएका छन् । यसबाट नाइजेरियामा बालिकाको सुरक्षा पनि विस्तारै चुनौतीपूर्ण बन्दै गएको पाइएको छ ।

बोको हरामले शुक्रबार पनि यहाँका तीनजना बालिकालाई बम विस्फोटका लागि प्रयोग गरेको पाइएको छ । उक्त विस्फोट तीन जना बालिकाले गराएका थिए र विस्फोटमा उनीहरु पनि मारिएका छन् । नाइजेरियाको दामातुरु नामक एक नगरमा शुक्रबार गराइएको बम विस्फोटबाट १३ जनाको ज्यान गएको थियो । सो विस्फोटमा परी अरु कयौँ घाइते पनि भएका छन् ।

बोको हरामले नाइजेरियाको उत्तरपूर्वी क्षेत्रमा यस्तो हमला जारी राखेका छन् । उक्त नगर पनि नाइजेरियाको उत्तरपूर्वी क्षेत्रमा पर्दछ । नाइजेरियाका राष्ट्रपति मुहम्मदु बुहारी संयुक्त राज्य अमेरिकाका राष्ट्रपति बाराक ओबामासँग भेटवार्ताका लागि अमेरिका लाग्ने तयारी गरिरहँदा यस्तो हमला भएको छ । साथै शुक्रबार नै उक्त नगरको सुरक्षाको अवस्थाको अध्ययनगरी बोको हरामका विरुद्धमा लड्ने रणनीति निर्माण गर्न नाइजेरियाका सैनिक प्रमुख त्यसतर्फ लाग्ने तयारी गरिरहँदा उनीहरुले यो आक्रमण गरेका हुन् ।एजेन्सी

Check Also

afganistan-1

अफगानिस्तानमा बीस दिनमा तीन सय सत्तरीको विद्रोही लडाकूको मृत्यु

कात्तिक ९। अफगानी सरकारी सुरक्षा कारबाहीमा त्यहाँको उत्तरी गाजनी प्रान्तमा बितेको २० दिनमा कम्तिमा ३७० …