सामाजिक सञ्जालबाट पार्टी चलाउन खोज्दा हामी विभाजन भयौं

सामाजिक सञ्जालबाट पार्टी चलाउन खोज्दा हामी विभाजन भयौं
विवेकशील साझाका नेता मुमाराम खनाल
२०७४ साल साउन ११ गते रवीन्द्र मिश्रले नेतृत्व गरेको साझा पार्टी र उज्ज्वल थापाले नेतृत्व गरेको विवेकशील एक भएर विवेकशील साझा पार्टी बनेको थियो । वैकल्पिक शक्तिका रुपमा आफूलाई स्थापित गर्ने भन्दै गठन भएको ती दुई दल अहिले फेरि फुटेका छन् । केही दिनअघि मात्रै १६ जना केन्द्रीय सदस्यसहित थापाले निर्वाचन आयोगमा गएर नयाँ दल दर्ता गरेपछि पार्टी औपचारिक रुपमा विभाजन भएको हो । विभिजनपछि निकै चर्चा भयो ।
थापा समूहले मिश्र समूहलाई राजनीतिक परिपक्वता नभएको आरोप लगायो भने मिश्र समूहले थापा समूहले वैकल्पिक शक्तिका रुपमा अघि बढ्ने औकात नै नदेखाएको आरोप लगायो । पार्टी विभाजनपछि मिश्रले पत्रकार सम्मेलन गरेर आफूलाई जति उचाले पनि विरोध नगर्ने मात्रै भनेनन् कुनै बेला फेरि विवेवकशीलसँग एकता हुने आशा पनि व्यक्त गरे । तर, मिश्रले भनेजस्तो यी दुई पार्टी छिट्टै एक होलान् भन्ने अनुमान गर्न पनि मुस्किल छ । त्यसो त साझा पार्टीका केही नेताले देशभरि नै विकेकशील साझाको माहोल बनेपछि आत्तिएर सम्हाल्न नसक्ने भएपछि पार्टी छाडेको समेत आरोप लगाएका छन् । विवेकशील साझा किन फुट्यो ? के–के थियो फुट्नुका कारण ? अब एक हुने सम्भावना छ त ? यिनै विषयमा विवेकशील साझाका नेता मुमाराम खनालसँग मोहन बास्तोलाले गरेको कुराकानी—
तपाईंहरुले विवेकशील साझा पार्टीलाई वैकल्पिक शक्तिका रुपमा व्याख्या गर्दै आउनुभएको थियो । केही दिनअघि मात्र तपाईंहरु विभाजन हुनुभयो । अब वैकल्पिक शक्ति नै विभाजन भएपछि त तपाईंहरुको योजनामै ठेस लाग्ला नि ? 
म पार्टी विभाजन हुँदा पोखरामा थिएँ । मैले पनि त्यतिबेला केही सञ्चारमाध्यमका समाचार पढेर र हेरेर नै हाम्रो पार्टीका केही साथीहरु अलग भएका र निर्वाचन आयोगमा पुगेर नयाँ दल दर्ताका लागि निवेदन दिएको भन्ने जानकारी पाएँ । म त्यतिबेला निकै आश्चर्यचकित भएको थिएँ । उहाँहरु अलग हुनुभन्दा अघिका कुनै पनि छलफल र बैठकमा यस्ताखाले गम्भीर प्रकारका मतभेद, असहमतिहरु राखेको मलाई जानकारी छैन । 
 
भनेपछि उहाँहरु तपाईंहरुलाई समेत कुनै जानकारी नै नदिई अलग हुनुभयो होइन त ? 
हो, मलाई पनि अचम्म लागेको छ । अहिले उहाँहरुले अलग भएपछि जुन खालका आरोप लगाउनुभएको छ । त्यस्ता आरोपका बारेमा बैठकमा कुनै पनि छलफल भएको छैन । 
 
तर, उहाँहरुले त तपाईंहरुको कार्यशैलीप्रति नै गम्भीर असन्तुष्टि व्यक्त गर्दै विभिन्न धारणाहरु सार्वजनिक नै गर्नुभएको थियो त ? 
हामी दुई पार्टी एक भएपछि धेरै पटक केन्द्रीय कमिटीका बैठक बसेका थियौं । ती बैठक निकै सौहार्द प्रकारका नै थिए । तर, अकस्मात संयोजक उज्ज्वल थापा अमेरिका जानुभएको थियो । उहाँ लामो समय अमेरिका बस्नुभयो । अमेरिकाबाट फर्किएपछि उहाँ पार्टीका मिटिङ बैठकहरुमा आउन छाड्नुभयो । उहाँले हामीसँग कुनै पनि सल्लाह नै नगरी पार्टीको समीक्षा गर्छु भनेर बाहिर सञ्चारमाध्यममा जानुभयो । उहाँले त्यहाँ नै कमजोरी गर्नुभएको थियो । 
आधिकारिक कमिटीमा कुनै पनि कुराकानी र सल्लाह नगरी त्यसरी सञ्चारमाध्यममा जाने कुरा काम मात्रै गर्नु भएन । हामीले यी विभिन्न विषयमा असन्तुष्टि छ भने छलफल गरौँ भनेर केन्द्रीय कमिटीको बैठक बोलाएका थियौँ । त्यो बैठक बस्नुभन्दा अघि नै उहाँहरुले अलग भएको घोषणा गर्नुभयो । हामीले त्यो बैठकमा उहाँका असन्तुष्टिका विषयमा सम्बोधन गर्ने नै भनेका थियौँ । त्यो मौकासमेत नदिई उहाँले दल दर्ताका लागि निवेदन दिएपछि विभाजनको अवस्था आयो । 
 
उज्ज्वल थापा समूहले तपाईंहरुबाट वैकल्पिक राजनीतिक दल बन्न नसक्ने देखेपछि आफूहरु अलग भएको आरोप लगाएका छन् नि ? 
उहाँहरुको इच्छा र चाहनाको म कदर पनि गर्छु । उहाँलाई आगामी राजनीतिक यात्राको शुभकामना पनि दिन चाहन्छु । मेरो जानकारी अनुसार ३८ जनाको केन्द्रीय कमिटीका १६ जना साथीहरु नयाँ अभियानतिर जानुभएको छ । म फेरि पनि उहाँहरुलाई एक पटक शुभकामना भन्न चाहन्छु । तर, अहिले अलग भएर गएका अधिकांश साथीहरु यसअघि पनि बैठकमा सहभागी नहुने, पार्टीलाई समय नै नदिने र संगठन निर्माणको काममा अलिकति पनि नखट्ने प्रवृत्तिका हुनुहुन्थ्यो । मेरो विचारमा बढीमा चार–पाँच जना साथीहरु मात्रै अलिक सक्रिय हुनुहुन्थ्यो । अरु साथीहरु एकता प्रक्रियापछि नै एक ढंगले भन्ने हो भने निस्क्रिय जस्तै हुनुहुन्थ्यो । 
 
तर, उहाँहरुले मूल्य–मान्यता र विधि–प्रक्रियामा असन्तुष्टि व्यक्त गर्नुभएको छ नि त ? 
जहाँसम्म उहाँहरुले मूल्य–मान्यता र विधि–प्रक्रियामा असन्तुष्टि व्यक्त गर्नुभएको भन्ने कुरा छ । यो नै गलत छ । हाम्रो पार्टी सबैभन्दा बढी मूल्य–मान्यता र विधि–प्रक्रियामा विश्वास गर्ने पार्टी हो । तर, जसले बढी मूल्य–मान्यता र विधि–प्रक्रियाको कुरा गरिरहनुभएको छ । उहाँहरुले नै बढी उदण्डता व्यक्त गर्दा पार्टी विभाजनको अवस्थामा पुगेको हो ।
हाम्रा कयौँ कार्यक्रममा उहाँहरुले त्यस्ता उदण्डता प्रस्तुत गर्नुभएको इतिहास पनि हामीसँग छ । कुन मुद्दा ? कुन निर्णय ? र कुन एजेण्डामा ? उहाँहरुको असन्तुष्टि हो उहाँहरुले बैठकमा राखेर समाधानको बाटो खोजेर जाने आधार पनि प्रशस्त थियो । तर, उहाँहरुले त्यो बाटो रोज्नु भएन । यो दुःखद कुरा हो । स्वयं उज्ज्वल थापाले पार्टीका कुनै पनि निकायसँग छलफल नै नगरी बाहिर सार्वजनिक गर्नुभयो । उहाँले त्यसरी सार्वजनिक गरेपछि पनि फेरि ती कुरा बैठकबाट ‘फेस’ गर्ने आँट गर्नुभएन । यो झन् दुःखद कुरा हो ।
उहाँको के कुरामा असन्तुष्टि हो भन्नेसमेत जानकारी नै नभई उहाँहरुले पार्टी विभाजनको प्रयास गर्नु यो उहाँहरुका लागि पनि त्यति सन्तोषजनक कुरा होइन । करिब डेढ महिना अघिको बैठकमा समेत उहाँले कुनै पनि असन्तुष्टि व्यक्त गर्नुभएको थिएन । सबै कुरा सर्वसम्मत रुपमा नै पारित भएका थिए । अचानक उहाँले किन त्यसो गर्नुभयो यो त भविष्यले पनि बताउला ।  
 
तपाईंहरुको दलको नाम नै विवेकशील साझा छ । तर, तपाईंहरु साझा पनि बन्न सक्नुभएन । विवेकलाई पनि प्रयोग गर्न सक्नुभएन । नाम जस्तो व्यवहार नहुने रहेछ भन्ने पनि कुरा छ नि ? 
सबैभन्दा ठूलो समस्या भनेको नै हाम्रा केही साथीहरुको राजनीतिक चरित्र नै थिएन । उहाँहरु पहिला पनि बेलाबेला मैले भएको भएन भने पार्टी छाड्छु भन्दै धम्की दिनुहुन्थ्यो । यो चरित्रले पनि पार्टी विभाजन हुनुमा भूमिका खेलेको छ । हामीले धेरै पटक उहाँहरुलाई राजनीतिक चरित्र देखाउनु होला भनेर आग्रह पनि गरेका थियौँ । केही समय त उहाँहरुले यो आग्रहलाई मान्नु पनि भएको थियो । पार्टी बिस्तारै गतिशील ढंगले अघि बढ्न थालेको थियो । पछि बिस्तारै फेरि उहाँहरु त्यसै गर्न थाल्नुभयो हामीले उहाँहरुलाई राजनीतिक चरित्र प्रस्तुत गरेर अघि बढौँ भन्ने कुरालाई सायद बुझाउन सकेनौँ कि यो सन्दर्भमा हमी असफल भयौँ । 
उहाँहरु फेसबुकमा लेखेर अथवा प्रचार गरेर मात्र चर्चामा आउनुपर्छ भन्नुहुन्थ्यो । हामीलाई त्यो उचित लाग्दैनथ्यो । हामी संगठन निर्माण गर्नुपर्छ । सञ्जाल फैलाउनुपर्छ भन्ने मान्यता राख्थ्यौँ । हामी बेमेल यहाँनेर पनि थियो । हामी जनताका बीचमा जानुपर्छ भन्ने उहाँहरु सामाजिक सञ्जालमा जानुपर्छ भन्ने भएपछि पनि कुरो मिलेन ।
 
No comment yet. Be the first one to comment.

नयाँ अपडेट


लोकप्रिय


जनमत


के विदेशमा गरिखाने वर्गका लागि गैर आवासीय नेपालि संघको सदस्यता , औचित्य छ ?

विचार


ब्लग