काठमाडौं । घरेलु मैदानमा नेपालले थ्री नेसन्स कप फुटबलको उपाधि उचालेको छ । सोमबार दशरथ रंगशालामा करीव १२ हजार समर्थकमाथ नेपालले उपाधीमाथि कब्जा जमाउँदा बंगालदेशलाई हरायो । नेपालले बंगलादेशमाथि २-१ गोल अन्तरको जित निकालेको हो ।

नेपालका लागि १८ औं मिनेटमा सञ्जोग राई र ४२ औं मिनेटमा विशाल राईले गोल गरे । संजोग राई म्यान अफ दी घोषित भए । बंगलादेशले ८३ औं मिनेटमा गोल फर्काएर नेपाललाई चूनौति दिन खोजे पनि त्यसपछि थप गोल हुन सकेन । थ्री नेसन्स कपमा नेपाल, बंगलादेश र कीर्गिस्तानको ओलम्पिक टीम सहभागी थिए । आजको खेलमा नेपालले करीव आधा दर्जन गोलको मौका खेर फाल्यो ।

आज नेपालले १८ महिनापछि पहिलो गोल गरेको हो । पछिल्लो पटक सन् २०१९ को सेप्टेम्बरमा भएको विश्वकप छनोटमा अन्जन विष्टले चाइनिज ताइपेइविरुद्ध गरेका थिए । त्यसपछि ८ खेलमा नेपाल गोलविहिन थियो । पहिलो हाफमै दुई गोलको अग्रता लिएको नेपालको दोस्रो हाफमा भने खेल केही कमजोर थियो ।

सोही मौकाको फाइदा उठाउँदै बंगलादेशले गोल फर्कायो । जितसँगै नेपालले ५ हजार अमेरिकी डलर पुरस्कार पायो । बंगलादेशले ३ हजार डलर नगद जित्यो । रोहित चन्द प्रतियोगिताको उत्कृष्ट खेलाडी बने । प्रधानमन्त्री केपी शर्मा ओलीले विजेता टोलीलाई उपाधी प्रदान गरे । उनी पुरै खेल अवधिभर रंगशालामा रहेका थिए ।