काठमाडौं । नेपालमा बसन्त ऋतुमा पर्वतारोहणमा जाने पर्यटक तथा नेपालीको संख्या उत्साहजनक रुपमा वृद्धि भइरहेको छ । कोरोना भाइरसको महामारीपछि पहिलो पटक पर्वतारोहण हुन लागेको हो । पर्यटन विभागका अनुसार बिहीबार साँझसम्म २० समूहका १ सय ५१ जनाले हिमाल आरोहण अनुमति लिएका छन् ।

अहिलेसम्म सगरमाथा, अन्नपूर्ण, मनास्लु, धौलागिरि, ल्होत्से, पुमरी, नुप्से र टुकुचे हिमाल जान अनुमति लिएका छन् । सगरमाथा चढ्न सबैभन्दा बढी सात आरोही समूहले अनुमति लिएका छन् । यो सिजन नेपालमा हिमाल आरोहण सहज मानिन्छ । सोहीकारण बसन्त ऋतुमा हजारौं पर्यटक तथा उनीहरुका सहयोगी नेपाल आउने गर्छन् । तर, कोरोनाको महामारीले हिमाल आरोहण अभियानमा समेत नकारात्मक प्रभाव पारेको छ ।