काठमाडौं । काठमाडौं उपत्यकामा आजबाट सबै प्रकारका सवारी साधनको संचालन खुला भएको छ । अब निजी तथा सार्वजनिक सवारी साधन निर्वाध चल्न सक्ने भएका हुन् । सार्वजनिक तथा निजी सवारी साधनमा लगाइएको जोर बिजोर प्रणाली हटेको छ । माइक्रो, टेम्पोसहित सानो क्षमताका सार्वजनिक सवाी साधन समेत आजबाट चल्ने भएका हुन् । उपत्यका भित्रका जिल्ला प्रशासन कार्यालयहरुले आदेश जारी गरि यस्तो जानकारी गराएका हुन् ।

आजदेखि काठमाडौं उपत्यकाभित्र प्रवेश गर्र्न भने सम्बन्धित जिल्ला प्रशासन कार्यालयको अनुमति लिने व्यवस्था गरिएको छ । सार्वजनिक यातायातमा सिट क्षमताभन्दा बढी यात्रु राख्न पाइने छैन भने मास्कलगायत स्वास्थ्यका मापदण्ड अनिवार्य रूपमा पालना गर्नुपर्नेछ।

माइक्रोको तेस्रो सिटमा चार चार जनाका दरले ८ जना र चालक छेउमा एक जना गरी ९ जना यात्रुभन्दा धेरै बोक्न पाइने छैन। आजबाट परीक्षाहरु चल्ने छन् । सभा सम्मेलन र पार्टी भोजभतेरमा रोक लगाइएको छ ।