काठमाडौं । कोरोना भाइरसको महामारी फैलिएसँगै अहिले लामो दूरीमा सार्वजनिक यातायात चल्न सकेको छैन । जसले र्गा सर्वसाधारण निजी सवारीमा महंगो भाडा तिरेर यात्रा गर्न बाध्य छन् । सरकारले अब सार्वजनिक बसहरु लामो दूरीमा समेत चलाउने तयारी गरेको छ । काठमाडौं उपत्यकामा जारी निषेधाज्ञा थप्ने र लामो दूरीको यातायात खुला गर्ने विषयमा सम्भवतः आजै निर्णय आउने तयारी छ ।

आज दिउँसो १ बजे काठमाडौँ उपत्यकाका तीन वटै जिल्लाका प्रमुख जिल्ला अधिकारीको बैठक बस्दैछ । यो बैठकले यातायात खुला गर्ने बारे महत्वपूर्ण निर्णय गर्न सक्ने सम्भावना छ । सम्पूर्ण हवाइ उडान खुलेको अवस्थामा सडक यातायात बन्द गर्न नहुने तर्क आएको छ । यातायात व्यवसायीले समेत यातयात खोल्न माग गरेका छन् । निषेधाज्ञा निकै खुकुलो बनेको छ । सोहीकारण पछिल्लो दिनमा संक्रमणको दर भने बढेको छ । तर, खोप अभियानसमेत जारी रहेका कारण अर्थतन्त्र चलायमान बनाउनु पर्ने माग उठिरहेको छ ।