काठमाडौं । अब काठमाडौं उपत्यकाबाट लामो दूरीका यातायात साधन समेत प्रवेश गर्न सक्ने भएका छन् । जिल्ला प्रशासन कार्यालय काठमाडौंले लामो दुरीको सवारीसाधन सञ्चालनको अनुमति दिएको हो । शुक्रबार एक सूचना जारी गरि लामो तथा मध्यम दुरीका सवारीसाधन सञ्चालनको व्यवस्था गर्न अनुरोध गरेको हो। मन्त्रिपरिषद्को निर्णय अनुसार गृह मन्त्रालयबाट परिपत्र भएको भन्दै सो अनुसार जिल्ला प्रशासन कार्यालयले सूचना जारी गरेको हो ।

त्रिभुवन विश्वविद्यालय, लोक सेवा आयोग लगायतका परीक्षा हुने भएकोले लामो तथा मध्यम दुरीका सवारीसाधन चलाउने व्यवस्था मिलाउन लागेको हो। परीक्षार्थी तथा सर्वसाधरणहरूको आवतजावतलाई सहज बनाउन उपत्यकाका सम्पूर्ण व्यवसायीहरूले नेपाल सरकारले तोकेको स्वास्थ्यको मापदण्डको पूर्ण पालना गरी मध्यम तथा लामो दुरीका सार्वजनिक यातायात सञ्चालनको व्यवस्था मिलाउन अनुरोध गरिएको छ । यात्रु गर्नेहरूलाई टिकट काटेर मात्रै यात्रा गर्न प्रशासनले अनुरोध गरेको छ। उपत्यका भित्रको सवारी साधन भने यसअघि नै संचलनमा छन् ।