काठमाडौं । नेपालमा एक वर्षको अवधिमा विदेशबाट ९ खर्ब ६१ अर्ब ५ करोड रुपैयाँ रेमिट्यान्स भित्रिएको छ । वैदेशिक रोजगारीमा गएका नेपालीले सो परिमाणमा रेमिट्यान्स पठाएका हुन् । आर्थिक वर्ष २०७७\७८ मा सो मात्रामा रकम भित्रिएको नेपाल राष्ट्र बैंकको तथ्यांकमा उल्लेख छ । अघिल्लो आर्थिक वर्षको तुलनामा भने यो आवमा रेमिट्यान्स ९.८ प्रतिशतले बढेको छ । कोरोना महामारीका वावजुत भित्रिएको रेमिट्यान्सले अर्थतन्त्रमा भने उत्साह थपेको छ । यो रकम एक वर्षमा भित्रिएको सबैभन्द ठूलो रकम हो ।

राष्ट्र बैंकका अनुसार गत साउनमा ९३ अर्ब, भदौमा ७३ अर्ब, असोजमा ९३ अर्ब, कात्तिकमा ७८.९ अर्ब, मंसिरमा ७९ अर्ब रुपैयाँ रकम भित्रिएको छ । पुसमा साढे ७८ अर्ब, माघमा साढे ७२ अर्ब, फागुनमा साढे ७४ अर्ब, चैतमा ८७ अर्ब, वैशाखमा ८१ अर्ब, जेठमा ६१ अर्ब र असारमा साढे ९० अर्ब रुपैयाँ रेमिट्यान्स नेपाल भित्रिएको देखिएको छ । कतार, दुबई, मलेसियालगायत मुलुकबाट नेपालमा बढी रेमिट्यान्स आउने गरेको छ ।