काठमाडौं । नेपालमा करीव डेढ वर्षपछि चलचित्र हल खुलेका छन् । अर्थातः अब चलचित्र हल संचालक र निर्माताले फिल्म रिलिज हलमा पुगेर गर्न सक्छन् । तर, यसका लागि स्वास्थ्य मापदण्ड भने पालना गर्नुपर्छ । सरकारले अनुमति दिए पनि निर्माता र संचालक तत्काल फिल्म ल्याइहाल्ने मुडमा भने छैनन् । अहिले पनि मानिसहरुमा त्रास बाँकी छ । सोहीकारण धेरैको कुराई दशैं र तिहारजस्ता चाडबाड र लामो बिदाको समयलाई मौकाका रुपमा हेर्न सक्ने हुन सक्छ ।

चलचित्र निर्माताहरुका अनुसार अहिले करीव २ दर्जन चलचित्र निर्माण सम्पन्न भई प्रदर्शनको तयारीमा रहेका छन् । अर्कोतर्फ बन्द रहेका हलको व्यवस्थापन र सरसफाइमा समेत केही समय लाग्ने भएको छ । यसले गर्दा कम्तिमा एक महिना अझै पनि हलमा पुगेर चलचित्र हेर्न पाउने सम्भावना कम छ ।

नेपाल चलचित्र संघका अनुसार हल सुरक्षित बनाउने र दर्शकको मनोवैज्ञानिक त्रास हटाउने गरि काम गरिने छ । यसअघि शुक्रबार चलचित्र विकास बोर्ड, व्यवसायी र निर्देशकसँग जिल्ला प्रशासन कार्यालयले छलफल समेत गरेको थियो । संघका अनुसार अहिले देशभर दुई सयभन्दा बढी हल पूर्णरुपमा बन्द छन् । अर्बौं रुपैयाँ जोखिममा रहेको छ भने सयौं मानिस बेरोजगार बनेका छन् ।