काठमाडौं । विश्व फूटबलकै एक शक्तिशाली मुलुक हो अष्ट्रेलिया, एसियामा त उसको एकछत्र राज रहेको छ ।

विश्वकप छनोट तथा एसियाकपका लागि समेत छनोटका लागि अष्टेलिया र नेपालबीच नेपालको घरेलु मैदानमा खेल हुने तय थियो ।

खेल यसै महिना नेपालको दशरथ रंगशालामा हुनुपर्ने थियो । शक्तिशाली मुलुकसँग घरेलु मैदानमा आफ्नो टीमले खेलेको हेर्ने दर्शकको चाहना कोरोना भाइरसका कारण अवरुद्ध भएको छ ।

फिफा र एएफसीले मार्च र जुन महिनाभ चल्ने कतार विश्वकप र एसियाकप छनोटका खेल रोक्ने निस्थगित गर्ने निर्णय लिएका छन् ।

यसले नेपालको अष्ट्रलियासँगको होम गेम अवरुद्ध भएको छ । कोरोना भाइरसको बढ्दो संक्रमणलाई ध्यानमा राख्दै एएफसी र फिफाले सदस्य राष्ट्रहरूको आग्रह स्वीकार गर्दै खेल रोक्ने निर्णय लिएको बताएका छन् ।

फिफाले सदस्य राष्ट्रहरू छनोट खेल्नका लागि एक अर्काविरुद्ध सहमत भएमा र सुरक्षाको हिसाबले फिफा र एएफसीलाई मन्जुर भएमा अनुमति दिन समेत सकिने उल्लेख गरेको छ ।

रोकिएका खेलको तालीका वातावरण सहज भएपछि पुनः सार्वजनिक हुनेछन् । यसअघि नेपालमा एभरेष्ट पिम्रियर लीग अवरुद्ध भएको थियो ।