काठमाडौं । कोरोना (केभिड १९) को संक्रमण दिनप्रतिदिन बढ्दो छ ।

३१ डिसेम्बरबाट फैलावट शुरु भएको यो भाइरस संसारका करीव सबै मुलुक प्रभावित छन् । बुधबार विश्वभर एकै दिन ७६ हजार नयाँ संक्रमित भेटिएको आंकडा विश्व स्वास्थ्य संगठनको रहेको छ ।

यसअनुसार यो भाइरस अझै पनि थामिने पक्षमा छैन । अमेरिकामा मात्र २६ हजार भन्दा बढी नयाँ संक्रमित भेटिएका छन् ।

स्पेनमा ८ हजार बढी नयाँ संक्रमित बुधबार थपिएका छन् । इटलीमा बुधबार थप साढे ४ हजार संक्रमित भेटिए ।

इटलीमा भने नयाँ संक्रमित आउने दर घटिसकेको छ । तर, अमेरिका र स्पेनमा भने यो दर तिब्र रहेको छ । विश्वव्यापी महामारी कोरोना भाइरसका कारण बुधबार एकै दिनमा करीव ५ हजार मानिसको ज्यान गएको छ ।

अमेरिकामा पछिल्लो २४ घण्टामा १ हजार भन्दा मानिसले ज्यान गुमाए । स्पेनमा बुधबार एकैदिन ९ सय २३ जनाको मृत्यु भयो ।

स्पेनमा मृत्यु हुनेको संख्या ९ हजार ३ सय पुगेको छ । यहाँ कुल संक्रमित १ लाख ४ हजार रहेका छन् । इटलीमा बुधबार ७ सय २७ जनाको मृत्यु भएको छ ।

यहाँ कुल १३ हजारले ज्यान गुमाएका छन् । इटलीमा कुल संक्रमितको संख्या १ लाख १० हजार पुगेको छ ।

फ्रान्समा एकै दिन ५ सय जनाले ज्यान गुमाए । बेलायतमा साढे ५ सय जनाको मृत्यु भएको छ।

विश्वभर कोरोना भाइरसबाट संक्रमित हुनेको संख्या ९ लाख ३० हजार भन्दा बढी पुगेको छ। यसबाट करीव २ लाख मानिस उपचारपछि निको भएका छन् । संसारभर करीव ४७ हजार मानिसले ज्यान गुमाएका छन् ।