प्रकाशित: २०७४ कार्तिक १३
काँग्रेसलाई दुखेका कुरा

Image

बिराटनगरमा बसेर नेपाली काँग्रेसका नेता शेखर कोइरालाले भन्दैछन्– ‘वाम एलाइन्सले मुलुकमा राम्रै बहुमत ल्याउने खतरा देखियो ।’ स्रोतकाअनुसार उनी मधेशीहरूसँग गठबन्धन बन्न नसकेकोमा निकै दुःखी छन् । मधेशीलाई देउवाले ध्यान नदिएको उनको विश्लेषण छ । संविधान संशोधनको लागि संसदमा पटक–पटक प्रस्ताव दर्ता गरियो । अनेक खालका काम भए तर आखिर मधेशीहरू काँग्रेससँग खुशी त रहेनछन् भन्ने ठहर उनको रहेको बताइन्छ । 
 
अब सबैभन्दा बढी आशा गरेको २ नम्बर प्रदेशमा समेत नेपाली काँग्रेसलाई गाह्रो भएको छ । उपेन्द्र यादवले बरु राम्रो नतिजा ल्याउने भए भन्ने चिन्ता उनले व्यक्त गर्दै रहेको बुझिएको छ । भारतसँग पनि कोइरालाको निकै ठूलो गुनासो छ । स्रोतकाअनुसार, आफ्ना निकटस्थहरूसँग उनी भन्छन्, ‘भारतले पनि अनावश्यक हस्तक्षेप ग¥यो र काँग्रेसको अन्ततः यो हालत भो, पार्टी बदनाम भो । एमाले र माओवादीबीच तालमेलमा समस्या होला भन्ने थियो तर त्यस्तो देखिएन बरु हाम्रैमा पो धेरै सकस भो ।’
 
उता भोजपुरमा भने उपेन्द्र यादवको फोरमको लागि काँग्रेसले एक सिट छाडिदिएको छ । उपेन्द्र मोरङ– ५, सुनसरी–४ वा सप्तरी–२ कहाँबाट उठ्ने भन्नेमा अन्योलमा छन् । मोरङको त्यो क्षेत्रमा एमाले–माओवादी गठबन्धनबाट शिवकुमार मण्डल उठ्दैछन् भने सुनसरी ५ मा काँग्रेसले ज्ञानेन्द्रबहादुर कार्कीलाई उठाउने भएको छ । त्यो क्षेत्रमा ३५ हजार पहाडे मूलको मत संख्या छ । त्यस्तै २० हजार मुस्लिम मत रहेको छ । यसअघि उपेन्द्र त्यही क्षेत्रबाट उठेका थिए । अहिले जफर जमालीलाई प्रदेशसभामा उठाएर उपेन्द्रले आफू केन्द्रीय संसदमा उठ्ने तयारी गरेका हुन् ।
 
सप्तरी–२ मा यादवको १० हजार मत छ । जातीय रुपमा यादवहरू बढी भएको यो क्षेत्रमा राजविराज नगरपालिका पनि पर्छ । शरद्सिंह भण्डारी बर्दिबासभन्दा दक्षिणबाट उठ्ने योजनामा छन् । डेमोक्रेटिक एलायन्स मधेशमा राजपाले दुई तिहाई र देशभर एकतिहाई माग गरेपछि भाँडिएको हो । बाबुरामलाई काँग्रेसले गोर्खामा सघाउँदैछ जबकि प्रचण्ड र ओलीसँग बाबुरामले पार्टी एकताको कुरा गर्दाचाहिँ अनिष्ट भो भन्दै वाम अधिनायकत्वको सम्भावना त्यही काँग्रेसले देख्दैथियो । 
s