प्रकाशित: २०७४ मंसिर १४
चितवनबाट प्रचण्डले भने– ‘देशलाई समृद्धिको यात्रामा लैजान वाम एकता’

Image

-विश्व न्यूज संबाददाता
चितवन, १४ मंसिर  । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले ७० वर्षको लामो भूमरीमा परेको राजनीतिलाई त्यसबाट निकालेर देशलाई समृद्धिको यात्रामा लैजाने अठोटका साथ वाम एकता भएको स्पष्ट पारेका छन् ।  चितवन क्षेत्र नं ३ अन्तर्गत पश्चिम चितवनको पटिहानीमा आज साँझ आयोजित चुनावीसभामा उनले भने– ‘यही मंसिर २१ को निर्वाचनपछि आउने कम्युनिष्टको सरकारले त्यो भूमरिबाट देशलाई निकालेरै छाड्छ, त्यसपछि मुलुकमा आर्थिक समृद्धि र विकासको यात्रा अघि बढ्छ ।’ 
 
चितवन क्षेत्र नं ३ को प्रतिनिधिसभा सदस्यका उम्मेदवारसमेत रहनुभएका अध्यक्ष दाहालले लामो संघर्ष र बलिदानपछि समावेशी र लोकतन्त्रसहितको संविधान बनेको उल्लेख गर्दै निर्वाचनपछि विकासले फड्को मार्ने बताए ।  
कम्युनिष्टको बलियो केन्द्र बनाउने उद्देश्यसहित ७७ वटै जिल्लामा साझा उम्मेदवार खडा गरेको उल्लेख गर्दै उनले सबैका निम्ति यो खुसीको कुरा भएको बताए ।  
अध्यक्ष दाहालले भने–‘देशमा स्थिरता होस् र समृद्धि होस् भन्ने चाहना राख्ने काँग्रेसलगायत अरु पार्टी सबैले कम्युनिष्ट एकतालाई सकारात्मक रुपमा हेरेको छ ।’ 
 
यसअघि आफू पढेको चितवनको शिवनगर स्थित नारायणी विद्यामन्दिर उच्च माविमा आज अपराह्न भएको एक अन्तरक्रियामा उनले स्कुलका सहपाठी गुरुहरुसँग भेट हुँदा पुरानै सम्झना आएको बताउँदै यही स्कुलको शिक्षाले अहिले आफू यहाँसम्म आइपुगेको भन्दै खुसी व्यक्त गरे ।  
आजै भरतपुर–२१ पर्वतीपुरमा जेष्ठ नागरिकसँगको अन्तरक्रियामा अध्यक्ष दाहालले ज्येष्ठ नागरिकको आशिर्वादले आफूले चुनाव जितेको जस्तै महसुस भएको उल्लेख गरे ।