काठमाडौं । एक महिने राष्ट्रिय जागरण अभियानका दौरान साढे ३१ हजार कार्यकर्ता कांग्रेस बनेको दावि नेपाली कांग्रेसले दावि गरेको छ । अभियान सकेलगत्तै कांग्रेसले बिहीबार पत्रकार सम्मेलन गर्दै उक्त दावि गरेको हो ।

अभियानका क्रममा दुई हजार हाराहारीमा भेला, सभा तथा अन्तरक्रिया आयोजना भएको प्रवक्ता विश्वप्रकाश शर्माले जानकारी दिए ।

कांग्रेसले सबै जिल्लामा जागरण अभियान संचालन गर्न ७७ जना केन्द्रीय सदस्य जिल्लामा खटाएको थियो। केन्द्रीय प्रतिनिधिलाई जिल्लामा कांग्रेसका गुटगत विवाद मिलाउनेदेखि संगठनलाई सक्रिय बनाउने जिम्मेवारी दिइएको थियो ।

शर्माका अनुसार आगामी १४ असार अघि नै केन्द्रीय प्रतिनिधि र पार्टीका नेताबीच स्थानीय तहमा सुनेका गुनासाबारे छलफल गर्ने कार्यक्रम रहेको छ ।

भदौदेखि भने दोस्रो चरणका अभियान शुरु गर्ने तयारी कांगे्रसले गरेको छ । उक्त अभियान शुरु गर्नु अगाडी पार्टी भित्रका सबै विभाग पूर्णता दिने, नेपाल विद्यार्थी संघको तदर्थ समिति बनाउने र तरुण दललाई पनि पूर्णता दिइने दाबी कांग्रेसले गरेको छ ।

एक महिना अवधिमा देशभरबाट ३१ हजार ५ सय ४२ जना मानिस कांग्रेस प्रवेश गरेको दावि कांग्रेसले गरेको छ ।