काठमाडौं । विश्वभर कोरोना भाइरसका कारण ज्यान गुमाउने व्यक्तिको संख्या पौने तीन लाख पुगेको छ । बिहीबार बिहानसम्मको तथ्यांक अनुसार विश्वभर २ लाख ६५ हजार ५१ मानिसले यस भाइरसका कारण ज्यान गुमाएका छन् ।

विश्वका २१२ मुलुक र २ वटा पानीजहाजमा यो रोगको फैलावट रहेको छ । विश्वमा यस भाइरसले ३८ लाख २१ हजार ९१७ जना मानिसलाई संक्रमित बनाएको छ ।

संक्रमितमध्ये १३ लाख १ हजार ७२५ जना उपचारपछि घर फर्किएका छन् । २२ लाख ५५ हजार १४१ जनाको उपचार भइरहेको छ ।

उपचाररत मध्ये ४८ हजार २११ जनाको अवस्था गम्भीर रहेको तथ्यांक छ । यस भाइरसले सबैभन्दा धेरै अमेरिकामा ७४ हजारभन्दा बढीको मृत्यु भएको छ ।

विगत २४ घण्टामा अमेरिकामा २ हजार ५२८ जनाको ज्यान गएको छ । अब अमेरिकामा कूल मृतक संख्या ७४ हजार ७९९ पुगेको छ ।

यहाँ पछिल्लो २४ घण्टामा त्यहाँ २५ हजार ४५९ जना नयाँ संक्रमित थपिएसँगै कुल संक्रमितको संख्या १२ लाख ६३ हजार ९२ पुगेको छ ।

अमेरिकापछि बेलायतमा धेरै मानिसको ज्यान गएको छ । बेलायतमा पछिल्लो २४ घण्टामा ६४९ जनाको मृत्यु भएको छ ।

यहाँ ज्यान गुमाउनेको संख्या ३० हजार ७६ पुगेको छ । इटालीमा एकै दिन ३६९ जनाको मृत्यु भएको छ । इटालीमा कूल मृतक संख्या २९ हजार ६८४ पुगेको छ ।

कोरोना भाइरसको संक्रमणबाट भारतमा ज्यान गुमाउनेको संख्या १ हजार ७ सय नाघेको छ ।

त्यहाँ एकै दिन ८२ जनाले ज्यान गुमाएका छन् । योसँगै मृतकको संख्या १ हजार ७८५ पुगेको हो ।

भारतमा एकैदिन थप ३ हजार ५८७ जनामा संक्रमण देखिएसँगै संक्रमित हुनेको संख्या ५२ हजार ९८७ पुगेको छ । नेपालमा ९९ जनामा संक्रमण देखिएको छ । २२ जना निको भएर घर फर्किएका छन् । यहाँ मानवीय क्षति भएको छैन ।