न्युयोर्क

प्रार्थना दिवसको अवसर पारेर अमेरिकी राष्ट्रपति निवास व्हाइट हाउसमा गत ७ तारिख शान्ति पाठ गराइयो । न्युजर्सी राज्यस्थित स्वामी नारायण मन्दिरका पूजारी हरिस ब्रम्ह भट्टलाई राष्ट्रपति ट्रम्पले शान्ति पाठको लागि निमन्त्रणा गरेका थिए ।  पूजारी ब्रम्ह भट्टले बैदिक मन्त्रको साथमा शान्ति पाठ गरेका थिए । कोरोना भाईरसले विश्व अक्रान्त बनेको समयमा यो महामारीबाट प्रभावित सबैको सुरक्षा   कुशलता र स्वास्थको लागि ह्वाइट हाउस रोज गार्डनमा बैदिक मत्र पाठ गरिएको हो ।  

मन्त्र पाठ गर्नु अगाडि पूजारी ब्रम्ह भट्टले मन्त्रको बारेमा भनेका थिए; “यो एउटा अत्यन्त प्रभावशाली हिन्दू प्रार्थना हो । यो बैदिक प्रार्थनालाई यजुर्बेदबाट लिइएको हो”।

मन्त्र पाठ पछि उनले उक्त मन्त्रको अर्थ अंग्रेजीमा उल्था गरेका थिए । मन्त्रोच्चारण समारोहमा राष्ट्रपति ट्रम्प लगायत अन्य धर्मका गुरु तथा ह्वाइट हाउस कर्मचारीको उपस्थिती रहेको थियो ।