कोपा अमेरिका फूटबल प्रतियोगितामा बलियो टोली अर्जेन्टिनालाई कोलम्बियाले हराएको छ । आइतबार बिहान सम्पन्न खेलमा विश्व चर्चित खेलाडी लियोनल मेस्सीको कप्तानी रहेको अर्जेन्टिना कोलम्बियासँग पराजित हुन पुग्यो ।

ब्राजिलमा जारी प्रतियोगिताको समूह चरणमा पहिलो खेलमै जीत निकाल्ने क्रममा कोलम्बियाले अर्जेन्टिनालाई २-० गोल अन्तरले हरायो ।
कोलम्बियाका लागि रोजर मार्टिनेज र डुभान जापटाले १–१ गोल गरे ।

बलमा आफ्नो पकड राखेपनि अर्जेन्टिनाले गोल गर्न भने सकेन । विश्वचर्चित खेलाडीहरुको बाहुल्य रहेको अर्जेन्टिनालाई सजिलै हराउने क्रममा कोलम्बियाले दोस्रो हाफमा दुई गोल सम्भव बनाएको थियो । पहिलो हाफ भने बराबरीमा सकिएको थियो ।

खेलको ७१औं मिनेटमा मार्टिनेजले गोल गर्दै कोलम्बियालाई अग्रता दिलाए । ८६ औं मिनेटमा कोलम्बियाले अग्रता दोब्बर पार्यो , तर, अर्जेन्टिना खेलमा फर्कन सकेन ।

पहिलो खेलमै भोगेको हारले अर्जेन्टिनाका दोस्रो चरणको यात्रामा चुनौति खडा भएको छ ।

आइतबार नै सम्पन्न अर्को खेलमा भने पेरु र भेनेजुएलाले गोलरहित बराबरी खेल्दै अंक बाँडे ।