न्युयोर्क

न्युयोर्क ब्रुकलिनमा बसोबास गर्दै आएका एक उदाउदो र्यापरको फिल्मी शैलीमा शुक्रबार राती हत्या भएको छ । हालै ‘क्यान नट डाई ईन द स्ट्रिट’ यानेकी ‘म सडकमा मर्न सक्दिन’ बोलको गीत गाएर चर्चामा आएका २३ बर्षीय के जे बाल्लाको गोली प्रहारबाट हत्या गरिएको हो । २२ तारिख शुक्रबार राती ब्रुकलिनमा गाडी चलाईरहेको अवस्थामा र्यापर बाल्लामाथि गोली प्रहार भएको हो ।  ब्रुकलिन ईस्ट न्युयोर्कस्थित आफ्नै निवासबाट एक माईलको दुरीमा राती १० बज्न केही मिनेट बाँकी हुँदा र्यापर बाल्लालाई ५ राउण्ड  गोली प्रहार गरिएको न्युयोर्क प्रहरीले जनाएको छ । बाल्लालाई आफ्नो गाडीसँगै सडकमा गुडिरहेको अर्को गाडीबाट फिल्मी शैलीमा गोली प्रहार गरिएको प्रहरीले जनाएको छ । र्यापर बाल्लालाई ब्रुकलिन युनिभर्सिटी मेडिकल सेन्टरमा शुक्रबार राती नै मृत घोषणा गरिएको थियो । 

घटनाको समय र्यापर बाल्लासंगै गाडीमा रहेका अर्को एक जनाको गोली लागेर घाईते अवस्था उपचार भै रहेको बताईएको छ ।  घटनामा संलग्न कोही पनि हालसम्म पक्राउ परेको छैन ।