बुटवल । नेपालमा कोरोनाबाट निको हुने संक्रमितको संख्या २२४ पुगेको छ । आइतबार बुटवल धागो कारखानामा बनाइएको कोरोना विशेष अस्पतालबाट चारजना कोरोना संक्रमित निको भएका छन् । आइतबार कपिलवस्तुका ३ जना र रुपन्देहीका १ जनाले कोरोनालाई जित्न सफल भएका हुन् । यी संक्रमित वैशाख २९ र ३० गते अस्पतालको आइसोलेसन वार्डमा भर्ना भएका हुन् । पछिल्लो २४ घण्टामा लगातार दुई पटक कोरोना परीक्षणमा नेगेटिभ रिपोर्ट आएपछि उउनीहरु बिदा भएका हुन् ।

यसअघि यस अस्पतालबाट रुपन्देहीको पहिलो कोरोना संक्रमित कोटहीमाई गाउँपालिकाका २५ वर्षीय युवकसहित ११ जना निको भएर घर फर्किसकेका छन् । कोरोना अस्पतालको आइसोलेसन जनरल वार्डमा अहिले ३१ जना र आईसीयुमा एकजना बिरामी छन् । प्रदेश पाँचमा भने कोरोना जितेर घर फर्किनेको संख्या ५२ जना भएको छ ।

बाँकेका २१ जना र कपिलवस्तुकी एकजना नर्स पनि निको भइसकेका छन् । आज कुल ५ जना डिस्चार्ज भए । यससँगै अब नेपालमा कुल डिस्चार्ज हुनेको संख्या २२४ पुगेको छ ।