काठमाडौं । भारतबाट नेपाल आउने क्रममा १० जेठमा बाटोमै ज्यान गुमाएका एक युवकको शव बोकेर आएका ३० जना युवामा कोरोना भाइरसको संक्रमण पुष्टी भएको छ । नेपाल ल्याइसकेपछि ती युवकको स्वाव परीक्षण गर्दा कोरोना पुष्टी भएको थियो । बाटोमै ज्यान गुमाएका युवाको शव बोकेका र सोही समूहमा आएकामध्ये ३० जनामा कोरोना पुष्टी भएको हो ।

उक्त समूहमा ५० जना रहेको स्थानीय प्रशासनले जनाएको छ । उनीहरुमध्ये ३० जनामा कोरोना संक्रमण भएको हो । घर फर्कने क्रममा भारतमै मृत्यु भएका युवकको कपिलवस्तु ल्याएर पोस्टमार्टम भएको थियो । पोष्टमार्टमका क्रममा स्वाब संकलन भएके थियो ।

भैरहवा जनस्वास्थ्य प्रयोगशालामा गरिएको परीक्षणमा कोरोना संक्रमण पुष्टि भएको थियो । मृतकमा कोरोना संक्रमण पुष्टि भएपछि भारतबाट सँगै आएका, मृतकको शव बोकेका र उनको सम्पर्कमा रहेका ५० जनाको स्वाब संकलन गरी पीसीआर परीक्षण भएको हो ।

सोमबार संक्रमित पुष्टी भएकामध्ये सन्धिखर्क नगरपालिकाका २९ जना, शितगंगा नगरपालिका र पाणिनी गाउँपालिकाका एक, एक जना छन् । कोरोनाका कारण १४ जनाको ज्यान गएकोमा एक जना अर्घाखाँचीका युवा हुन् ।