काठमाडौं । नेपालमा कोरोना भाइरसको संक्रमणबाट थप एक जनाको ज्यान गएको छ । अर्घाखाँचीको मालारानी गाउँपालिकामा क्वारेन्टिनमा रहँदै बिरामी परेका एक व्यक्तिको क्वारेन्टिनमै ज्यान गएको थियो । उनमा मृत्युपछि गरिएको स्वाव संकलनमा कोरोना पुष्टी भएको हो ।

मालारानी गाउँपालिका ४ ब्याडापाटास्थित एक सार्वजनिक आधारभूत विद्यालयको क्वारेन्टिनमा राखेका बेला उनी बिरामी परेका थिए । त्यसपछि उपचारका लागि बुटवल लगिएको थियो । बुटवलमा उपचारपछि घर फर्कने क्रममा उनको बाटोमै ज्यान गएको थियो । मृत्यु हुने ५७ वर्षका पुरुष रहेको बताइएको छ ।

जिल्ला स्वास्थ्य कार्यालय अर्घाखाँचीका अनुसार उनको जेठ २३ मा स्वाब संकलन गरी परीक्षणका लागि प्रादेशिक जनस्वास्थ्य प्रयोगशाला भैरहवा पठाइएको थियो । उनको मृत्यु र कोरोना पुष्टीबारे स्वास्थ्य मन्त्रालयले औपचारिक घोषणा गर्न भने बाँकि रहेको छ ।