फिचर

वैदेशिक रोजगारी आंशिक खुला, विद्यार्थी समेत विदेश जान पाउने

काठमाडौं । सरकारले वैदेशिक रोजगारी र अध्ययनका लागि विदेश जाने नेपाली नागरिकलाई सरकारले अनुमति दिने भएको छ । आंशिक रुपमा वैदेशिक रोजगारी खुला गर्ने निर्णय सरकारले गरेको हो । कोभिड-१९ संकट व्यवस्थापन केन्द्र (सीसीएमसी)को शुक्रबारको बैठकले नेपालमा बिदामा आएका र सम्बन्धित मुलुक तथा कम्पनीबाट अनुमति प्राप्त कामदारले रोजगारीमा जान पाउने भएका छन् ।

श्रम, रोजगार तथा सामाजिक सुरक्षा मन्त्रालयको सिफारिसमा उनीहरु विदेश जान सक्ने भएका छन् । सरकारले ३० फागुनदेखि श्रम स्वीकृति बन्द गरेको छ । बैदेशिक रोजगारीमा रहेका विदामा घर आएका बेला नेपालमै रोकिएका कारण उनीहरुको रोजिरोटी सुरक्षा गर्ने चूनौति सरकारसँग रहेको छ ।

कामदार र कम्पनीले नेपाली कामदारलाई विदेश पठाउने अनुमति मागिरहेका छन् । तत्कालका लागि अहिले विदामा आएका र करार अवधि बाँकी रहेका कामदार मात्र पठाइने भएको छ ।

नयाँ कामदारको हकमा भने निर्णय भएको छैन । विदेशमा अध्ययनरत विद्यार्थी समेत अब शिक्षा मन्त्रालयको सिफारिसमा विदेश जान सक्ने भएका छन् ।