13-Nov-2019 | २७ कार्तिक २०७६, बुधबार

कर्णालीमा झरेको जीप अझै भेटिएन, बझाङ दूर्घटनामा मृत्यु भएको ९ जनाको सामुहिक अन्त्येष्टी

४ असार २०७६, बुधबार ०   बिचार / प्रतिक्रिया


काठमाडौं । हुम्लाको खर्पुनाथ गाउँपालिका–५ स्थित कर्णाली नदीमा मंगलबारदेखि बेपत्ता जीप अझै फेला परेको छैन । खार्पुनाथ गाउँपालिका उपाध्यक्ष सिन्धु हमाल शाहीसमेत सवारी जीप हराएपछि प्रहरीले नदी खोजी कार्य तिब्र बनाएको छ ।

मंगलबार चितवनबाट सशस्त्र प्रहरी बलबो गोताखोर टोली कर्णाली पुगेपछि खोजी कार्य तिब्र बनाइएको थियो । तर, मंगलबार साँझसम्म पनि जीप र हराइरहेका यात्रुको कुनै निसाना फेला पार्न सकिएको छैन ।

घटनास्थलमा नेपाली सेना, सशस्त्र प्रहरी र नेपाल प्रहरीले निरन्तर खोजी कार्य जारी राखेका छन् ।

उता, सोमबार बझाङमा जीप दूर्घटनामा परी निधन भएका ९ जनाको बुधबार सामुहिक अन्त्येष्टी गरिएको छ । सोमबार बझाङको मष्टा गाउँपालिका १ मा दुर्घटना हुँदा चालकसहित ९ जनाको मृत्यु भएको थियो ।

जयपृथ्वी नगरपालिकाको डुग्रीबाट मष्टा गाउँपालिकातर्फ जाँदै गरेको से १ झ १०७२ नम्बरको जिप डौठ्या खोलास्थित घुम्तीबाट अनियन्त्रीत अप्ठयारो भीरमा झरेर दूर्घटना भएको थियो ।

यस जिल्लामा अहिलेसम्म नै एउटै दूर्घटनामा धेरै मानिसले ज्यान गुमाएको यो पहिलो पटक हो । मृतकहरुलाई अन्तिम श्रद्धाञ्जली दिनका लागि कोटलदेवलका स्थानीय र जिल्लाका विभिन्न ठाउँबाट सयौंको संख्यामा सर्वसाधारण उपस्थित भएका थिए ।

राजनीतिक दलका नेता, स्थानीय तहका जनप्रतिनिधि, कर्मचारी र सर्वसाधारण जिल्ला अस्पताल सिमखेतबाट धौलाबगर आर्यघाटसम्म शवयात्रामा सहभागी भएका थिए ।

दुर्घटनाको शोकमा मष्टा गाउँपालिकाले बुधबार सार्वजनिक विदा दिएको थियो । गाउँपालिकाले मृत्यू भएका परिवारलाई किरिया खर्चबापत पाँच हजार र घाइतेको उपचारका लागि प्रतिव्यक्ति ५० हजार रुपैयाँ आर्थिक सहयोग दिने निर्णयसमेत गरेको थियो ।

फेसबुकबाट तपाईको प्रतिक्रिया

सम्बन्धित समाचार