एजेन्सी

अमेरिकाको न्युजर्सी राज्यको इष्ट ब्रन्सविकस्थित एक प्राईभेट घरको करेसा (ब्याक यार्ड) को स्विमिङ पुलमा एक नाबालक सहित तीन जना मृत फेला परेका छँन् । पटेल थर भएका एकै परिवारको घरमा घटेको उक्त घटनामा ८ बर्षीया बालिका ३२ बर्षीया आमा निषा पटेल र ६२ बर्षीय नातेदार भरत पटेल सोमबार अन्दाजी ४ बजे दिउँसो  स्विमिङ पुलमा मृत फेला परेको प्रहरीले जनाएको छ । सोमबार करिब ४ बजेर १५ मिनेट जाँदा छिमेकीले ९११ मा फोन गरेको प्रहरीले जनाएको छ । फोनबाट खबर आए पछि घटनास्थलमा प्रहरी पुग्दा तिनै जना जमिन माथि निर्माण गरिएको पौडी पोखरीमा अचेत अवस्थामा भेटिएको पनि प्रहरीले जनाएको छ । प्रहरीले अचेत तीनै जनालाई सि पि आर बिधि मार्फत बचाउने कोसिस गरे पनि प्रयास निरर्थक भएको थियो ।  

घटना घटेको घरबाट चिच्याएको आवाज सुने पछि छिमेकीले प्रहरीलाई खबर गरेका थिए । छिमेकीले सुनेको चिच्याएको आवाज मृतक ३२ बर्षीया आमाको हुन सक्ने प्रहरीले अनुमान गरेको छ ।  

ईस्ट ब्रन्सविकस्थित प्रहरी प्रमुख फ्र्यांक लोसाकोले बिज्ञप्तीमा भनेका छन्; “यो हाम्रो सिंगो समुदायको लागि बिनासकारी दिन हो । अहिले नै घटना कसरी घटेको हो भनेर भन्नु हतार हुने छ” । घटनाको अनुसन्धान भै रहेको मिडिलसेक्स काउन्टी अभियोजकको कार्यालयले जनाएको छ । डब्लु एन बि सि समाचारका अनुसार कतिपयले घटना बिद्युतीय लाईन गडबडीको कारण भएको हुन सक्न्ने अनुमान गरेका छन् । पटेल परिवार गत मेई महिनामा मात्र उक्त स्थानमा सरेको थियो ।