एजेन्सी

चीनको उहानमा बसेर कोरोना भाईरस नियन्त्रणमा सरकारको फितलो प्रयास देखिने भिडियो सोसल मिडियामा राखेका कारण एक महिला नागरिक पत्रकारलाई प्रहरीले नियन्त्रणमा लिएको छ । ३७ बर्षीया कानून ब्यबसायी झाङ झानले गत फेब्रुअरीमा कोरोना महामारीको समयमा चीनबाट ‘लाइभ स्ट्रिमिङ’ गर्दै सरकारले कोरोना नियन्त्रणमा गरेको फितलो प्रयासको पाटो देखाएकी थिईन् । उनलाई संघाईबाट गत शुक्रबार नियन्त्रणमा लिएर प्रहरी हिरासतमा राखिएको साउथ चाईना मर्निङ पोष्टले जनाएको छ । उनी माथि सर्वसाधारणलाई खलल पुर्याएको अभियोग लगाईएको उनको पिताले पुष्टी गरेको पनि साउथ चाईना मर्निङ पोस्टले लेखेको छ ।  

संघाईबासी झान गत फेब्रुअरीमा उहान गएकी थिईन । त्यतिबेला उनले उहान शहरमा जे बातावरण थियो त्यसलाई ‘लाइभ स्ट्रिमिङ’ गर्दै ट्विटर, युट्युब लगायत अन्य सोसल मिडियामा राखेकी थिईन ।  भिडियोको साथमा झानले कोरोना रोकथामका बिषयमा त्यहाँका सरकारी अधिकारीहरुको फितलो प्रयासलाई पनि सोसल मिडियामा उजागर गरेकी थिईन ।  

ती नागरिक पत्रकारलाई प्रहरीले नियन्त्रणमा लिएपछि उनका ६३ बर्षीय पिताले ‘हाम्रो कोहीसँग चिनजान पनि छैन र छोरी छुटाउन पैसा पनि छैन’ भन्दै चिन्ता ब्यक्त गरेका छन्  ।

चीनको उहानमा कोरोना महामारी पछि सामाजिक संजालमा रिपोर्टिङ गर्ने अन्य तीन जना नागरिक पत्रकार बेपत्ता भएको पनि साउथ चाईना मर्निङ पोस्टले जनाएको छ ।  अप्रिल अन्त्यसम्म सामाजिक संजालमा सकृय लि – जिहुआ नामका नागरिक पत्रकार दुई महिनादेखि  बेपत्ता छन् । त्यस्तै पूर्व मानबधिकारबादी वकिल चेन क्युसी जो भिडियो पत्रकारिता पनि गर्दथे, उनी गत जनवरीमा उहान गएका थिए । क्युसी पनि त्यसपछि कसैको संपर्कमा छैनन् । अर्का ब्लगर फाङ् बिन पनि हराएका छन् ।