काठमाडौं । अन्तर्राष्ट्रिय उडान बन्द भएपछि विदेशमा अलपत्र नेपालीलाई घर ल्याउने अभियान जारी रहेको छ । शुक्रबारसम्म चाटर्ड उडानबाट २० हजार भन्दा बढी नेपाली स्वदेश फर्किएको सरकारी तथ्यांकले देखाएको छ । कोरोना भाइरसका कारण विभिन्न मुलुकमा समस्यामा परेका नेपालीलाई फर्काउन सरकारले चार्टर्ड उडानको व्यवस्थापन गरिरहेको छ ।

कतिपय मुलुकबाट सोही देशको सरकारले जहाज चार्टर्ड गरी नेपालीलाई पठाइरहेको छ । श्रम, रोजगार तथा सामाजिक सुरक्षा मन्त्रालयका अनुसार अहिलेसम्म २० हजारभन्दा बढी नेपाली घर फर्किएका छन् । उनीहरुमध्ये पिसिआर परिक्षण गरेर घर फर्किएकाहरुलाई होम क्वारेन्टिन बस्न पठाइएको छ ।

कतिपय होटल क्वारेन्टिनमा बसे भने कतिपय स्थानीय सरकारले बनाएको क्वारेन्टिनमा बसेका छन् । अहिलेसम्म फर्किएका नागरिक भने कम्पनीले टिकट काटिदिएका, सम्बन्धित सरकारले नेपाल पठाइदिएका र आफै टिकट काट्न समक्ष व्यक्तिहरु हुन् ।

आफै टिकट काट्न नसक्ने तर सरकारको उद्दारको प्रतिक्षामा रहेका व्यक्ति भने अझै पनि विदेशमा छन् । उनीहरुको उद्दारका लागि कार्यविधि पास भइसकेको छैन ।