न्युयोर्क

अमेरिकाका थुप्रै राज्यहरुमा पुन: कोरोना संक्रमित र मृतकको संख्यामा ब्यापक बृद्धि हुन थालेपछि महामारी सुरु भएर लकडाऊन गरिएका राज्यहरुको चरणबद्ध खुलाउने नीति तत्कालका लागि कि रोकिएका छन् कि त भने मिति नै सारेका छन् ।अमेरिकाको चिकित्सा अध्ययनका लागि ख्याति प्राप्त शिक्षण संस्था बेलर कलेज अफ मेडिसिनका डिन डा पिटर होटेजले शुक्रबार एक टेलिभिजनसँगको अन्तर्वार्तामा भनेका छन्; “यदि यही अनुपातमा देशभर कोरोना संक्रमण बढ्दै जाने हो भने अमेरिकी ईतिहासमा नै एउटा गम्भिर अस्थिर समय आउन सक्नेछ” । उनले अन्तर्वार्ताकै क्रममा थप भनें; ‘अब हाम्रा अस्पतालहरु भरिने छन् ।अस्पतालका साधारण बिरामी सुताउने सैय्या र आईसियुका सैय्या मात्र भरिने छैनन् , बिस्तारै अस्पतालमा काम गर्ने कर्मचारी थाक्ने छन्।अस्पतालमा  काम गर्ने चिकित्सक ,नर्स र कर्मचारी आँफै बिरामी हुने छन् ।अनि त्यति ठुलो संख्यामा संक्रमित भएकाहरुको उपचार गर्ने र ब्यबस्थापन गर्ने जनशक्ति कै संकट हुने छ । भाईरस नियन्त्रणको लागि कुनै राष्ट्रियस्तरको मार्ग चित्र छैन ।भाईरस नियन्त्रण गर्ने कुनै ईच्छाशक्ति नै ह्वाईट हाऊस प्रशासनसँग छैन । कहिले ९९ प्रतिशत भाईइरसले हानी गर्दैन भनेको छ । कहिले मृत्‍युदर एकदम कम छ भनेको छ । कहिले विश्व स्वास्थ संगठनलाई दोष लगाएर पन्छिएको छ” । डा पिटरले कोरोना संक्रमण र महामारीका बिषयमा ह्वाईट हाऊसबाट आउने सुचना तथ्यहिन सुचनामा आधरित हुने गरेको आरोप समेत लगाएका छन् ।

अमेरिकाभरमा शनिबारसम्म जम्मा ५ वटा राज्यमा मात्र दुई हप्तादेखि संक्रमितको संख्या नियन्त्रणमा देखिएको छ । राज्यस्तरमा भने अमेरिकाले यो हप्ता दुई पटक थप संक्रमितको नयाँ रेकर्ड कायम गरी सकेको छ । शुक्रबार मात्र अमेरिकामा ६६ हजार ७ सय २७ नयाँ संक्रमित पुष्टी भए भने शनिबार ७१ हजार ३ सय ८९ संक्रमित पुष्टी भएर नयाँ रेकर्ड  कायम भएको छ । जोन हप्किन्स युनिभर्सिटीका अनुसार शनिबारसम्म ३२ लाख २५ हजार ७ सय २१ जना संक्रमित भएका छन् भने १ लाख ३४ हजार ५ सय ८० को मृत्‍यु भै सकेको छ ।  

(डा पिटर होटेजले सिएनएनसँग गरेको कुराकानीका आधारमा तयार पारिएको रिपोर्ट )