न्युयोर्क      

न्युयोर्कमा कोरोना महामारी सुरु भए यता शुक्रबार सबैभन्दा कम बिरामी अस्पताल भर्ना भएका छन् । मार्चपछि शुक्रबार सबैभन्दा कम ७ सय ९९ जना मात्र न्युयोर्क राज्यभरका अस्पतालमा उपचारको लागि बिरामी भर्ना भएको गभर्नर कुमोले बताएका छन् । न्युयोर्क राज्यमा तीन दिनदेखि लगातार दैनिक ७ जनाको कोरोनाको कारण मृत्‍यु भएको छ भने शुक्रबार त्यो संख्या घटेर ६ जनाको मृत्‍यु भएको छ । न्युयोर्क राज्यमा दैनिक मृत्‍यु हुनेको यो संख्या मार्च १६ पछि सबैभन्दा कम हो । न्युयोर्कमा शुक्रबार ७ सय ३० जना नयाँ संक्रमित थपिएका छन् । शुक्रबार थपिएका मृतकको संख्यासंगै न्युयोर्क राज्यमा २४ हजार ९ सय ७४ को मृत्‍यु भएको छ ।  

गभर्नर कुमोले न्युयोर्क राज्यमा संक्रमित अस्पताल भर्ना हुने र मृतकको संख्या घटे पनि सप्ताहन्तमा भाईरसले बिदा नमनाउने हुँदा सबैलाई मास्क लगाउन, हात धुन, सामाजिक दुरी कायम गरी होसियार रहन  अनुरोध गरेका छन् ।