डि सि भर्जिनिया

अमेरिकास्थित वासिङ्टन डि सि मेट्रो क्षेत्रमा नेपालीभाषीहरुको स्वामित्व रहने सामुदायिक भवन निर्माणको उद्देश्य राखेर आज शनिबारदेखि सप्ताह महापुराण शुरु भएको छ । जुन २२ देखि २९ तारिखसम्म आयोजना हुने सप्ताह महापुराणमा भागवत् वाचन, पन्डित दिनबन्धु पोखरेलले गर्ने कार्यक्रम रहेको छ ।
न्यूयोर्क, टेक्सस, क्यालिफोर्निया पछि नेपालीभाषीहरुको बाक्लो बस्ती भएको डि सि भर्जिनियामा बिशेष तयारीका साथ आयोजित सप्ताह महापुराणको पहिलो दिन आज शनिबार बिशाल कलश यात्रा सम्पन्न गरियो । कलश यात्रा संगै त्यस क्षेत्रमा बसोबास गर्ने नेपालीहरु उत्साहका साथ सहभागी हुने क्रम शुरु भएको छ । सप्ताह महापुराण सुरु हुनु भन्दा केहि अगाडि देखि दान कबुल गर्ने क्रम समेत सुरु भएको छ । अमेरिकाको नेपाली डायस्पोरामा पछिल्लो समय सामुदायिक भवन र मन्दिर निर्माणको उद्देश्य राखेर महापुराण आयोजना गर्ने क्रम बृद्धी भएपनि कतिपय महापुराणमा उधारो चन्दाको ठुलो रकम घोषणा गर्ने तर समय बित्दै जाँदा बोलेको दान नतिर्ने प्रचलन भने ब्याप्त छ ।