काठमाडौं । भारतको केरलामा भएको हवाई दुर्घटनामा ज्यान गुमाउने व्यक्तिको संख्या १७ पुगेको छ । दुई पाइलटसहित १७ जनाको ज्यान गएको भारतीय संचारमाध्यमले जनाएका छन् । दुबईबाट आएको एयर इन्डिया एक्स्प्रेसको जहाज धावनमार्गमा अवतरणका क्रममा दूर्घटनामा परेको थियो । क्याबिन क्रुका चार जना सदस्य भने सकुशल रहे ।

जहाज शुक्रबार बेलुका ७ बजेर ४१ मिनेटमा केरलाको कोझिकोड विमानस्थलमा दुर्घटना भएको छ अवतरणको क्रममा रनवेमा चिप्लिएर विमान ३५ फिट टाढा खाल्डोमा खसेको थियो । भारी वर्षाका कारण दुई पटक अवतरणको प्रयास असफल भएको थियो । तेस्रो पटकको प्रयासमा दुर्घटना भयो र विमान दुई टुक्रा संचारमाध्यमले जनाएका छन् ।

हवाईजहाजमा चालक दलका सदस्यसहित १९० जना सवार थिए । त्यसमध्ये १० जना बच्चा थिए । दुर्घटनामा घाइते भएका १२३ जना यात्रुलाई अस्पताल भर्ना गरिएको छ । उनीहरुमध्ये पनि २० जना घाइते गम्भीर रहेको बताइएको छ । विभिन्न कारणले दुबई पुगेका यात्रु भारत फर्केका थिए । सोही जहाज दुर्घटनामा परेको हो । केरला पछिल्लो केही दिनयता प्राकृतिक विपत्तिको अवस्थामा समेत छ । शुक्रबार मात्र यहाँ पहिरोले १५ जनाको मृत्यु भएको थियो ।