काठमाडौं । राष्ट्रकवि माधवप्रसाद घिमिरेको राष्ट्रिय सम्मानसहित आज अन्त्येष्टि हुने भएको छ । आज उपप्रधानमन्त्री ईश्वर पोखरेलले घिमिरेको पार्थिव शरीरमा राष्ट्रिय झण्डा ओडाउने कार्यक्रम तय गरिएको छ । बिहान १० बजेबाट राष्ट्रकविलाई श्रद्धान्जली दिने कार्यक्रम प्रारम्भ हुनेछ ।

राष्ट्रकवि घिमिरेको मंगलबार साँझ ५ बजेर ५५ मिनेटमा काठमाडौंको कपुरधारास्थित आफ्नै निवासमा निधन भएको हो । उनको १०१ वर्षको उमेरमा निधन भएको हो । घिमिरे जन्म वि. सं. १९७६ असोज ७ मा लमजुङको पुस्तन गाउँमा भएको हो । उनलाई २०६० सालबाट राष्ट्रकविको उपाधी प्राप्त भएको थियो । नेपाली साहित्यका उच्च स्तरका व्यक्तित्वका रुपमा घिमिरेको योगदान अतुलनीय रहेको छ ।