काठमाडौं । गैरआवासीय नेपाली संघ (एनआएनए) ले विदेशबाट बीना भेदभाव अप्ठेरोमा परेका सबै नेपालीको उद्धार गर्न सरकारसँग माग गरेको छ । बिहीबार प्रतिनिधि सभाको महिला तथा सामाजिक समितिको भर्चुअल बैठकमा भाग लिँदै एनआएनएका प्रवक्ता डिबी क्षेत्रीले सरकार गर्ने उद्धारमा कुनै पनि नेपालीमाथि भेदभाव हुन नहुने बताए । अब राज्यले श्रम गरेर आएका र नआएका नभनी सबै नेपालीलाई घर फर्कने वातावरण बनाउनु पर्ने उनको माग थियो ।

इलिगल (अवैधानिक रुपमा बसोबास गरेका)लाई सरकारले उद्धार र राहतको सूचिमा नपारेकोमा समेत उनको गुनासो थियो । जस्तो अवस्थामा रहेपनि सबै नेपाली भएको उनको भनाई छ । खासगरी यूरोपमा इलिगल बसेका नेपाली यतिबेला समस्यामा छन् । तर, उनीहरु सरकारको उद्धारको सूचिमा भने पर्दैनन् । किनकी सरकारले अहिले वैदेशिक रोजगारीका सिलसिलामा समस्यामा परेका नेपालीलाई घर ल्याइरहेको छ ।

क्षेत्रीले विदेशमा अप्ठेरोमा परेका नेपालीको उद्धारका दौरान आर्थिक हिसाब किताब गौण विषय हुनुपर्ने समेत बताए । उनले विदेशमा घरेलु कामदारका रुपमा रहेका महिला बढी समस्यामा रहेको जानकारी गराए । उद्धारका क्रममा पहिलो प्राथमिता उनीहरुले पाउनु पर्ने क्षेत्रीको भनाई छ ।