काठमाडौं । रानीपोखरी अब सामान्य अवस्थामा फर्कन थालिसकेको छ । भुकम्पले भत्काएको रानीपोखरीको पुनर्निर्माण सम्पन्न भएसँगै रानीपोखरी ५ वर्षपछि पुनः भरिन लागेको हो । खानेपानी मन्त्रालयको सहयोगमा आयोजना कार्यान्वयन निर्देशनालयले रानीपोखरीमा पानी भर्न थालेको हो ।

विसं २०७२ सालको भूकम्पले क्षति गरेको रानीपोखरी पुनर्निमाण सम्पन्न हुने चरणमा रहेको छ । राष्ट्रिय पुनर्निर्माण प्राधिकरणको अनुरोधमा निर्देशनालयले रानीपोखरीमा पानी भर्न लागेको बताइएको छ ।

नेपालको धार्मिक, सांस्कृतिक तथा ऐतिहासिक धरोहरको रुपमा रहेको रानीपोखरी सुन्दर र मनमोहक बनाइएको छ । खानेपानी तथा सरसफाई मन्त्रालय अन्तर्गतको आयोजना कार्यान्वयन निर्देशनालयका अनुसार २ दिन लगाएर रानीपोखरीमा पानी भरिएको हो ।

रानीपोखरीमा कुल ३ करोड लिटर पानी भरिने भएको छ । रानीपोखरीको लम्बाई १८० मिटर रहेको छ । चौडाई १४० मिटर छ । रानीपोखरीमा पानी भर्न आयोजनाले बागमतीको पानी सुन्दरीजलबाट चाबहिल महांकाल रिङरोड हुँदै पानीपोखरीमा रहेको रिजर्भवायर टंयाकी भरेको थियो । जसका लागि मेलम्चीको पानी ल्याउन बनाइएको थोक वितरण प्रणालीको पाइपलाइन उपयोग गरिएको छ ।