काठमाडौं । वर्षको उत्कृष्ट खेल अर्वाड पल्सर स्पोर्ट्स अवार्डमा प्याराग्लाइडिङका खेलाडी युकेश गुरुङ उत्कृष्ट खेलाडी (पुरुष) बनेका छन् । लामो समयदेखि फूटबल र क्रिकेटका खेलाडीले यो अवार्डमा कब्जा जमाउने गरेका थिए ।

नेपाल खेलकुद पत्रकार मञ्चले हरेक वर्ष पल्सर स्पोर्ट्स अवार्ड आयोजना गर्छ । यस पटकको कार्यक्रम मंगलबार राजधानीमा सम्पन्न भयो ।

युशेकले पारस खड्का (क्रिकेट), इन्द्र बहादुर श्रेष्ठ (जुडो), सोमपाल कामी (क्रिकेट) र शुक्रबाहदुर राई (गल्फ) लाई पछि पार्दै उत्कृष्ट खेलाडी बनेका हुन ।
अघिल्लो वर्ष इन्डोनेसियामा सम्पन्न एसियाली खेलुकदमा नेपालले एक मात्र पदक प्याराग्लाइडिङबाट प्राप्त गरेको थियो ।

त्यस समय उनले उत्कृष्ट प्रदर्शन गरेका थिए । महिला तर्फ भने वर्षको उत्कृष्ट खेलाडी फुटबलकी सावित्रा भण्डारी घोषित भइन् ।

उनले भलिबलकी सरस्वती चौधरी, क्रिकेटकी सीता रानामगर, तेक्वान्दो की निमा गुरुङ र जुडोकी मनिता श्रेष्ठ प्रधानलाई पछाडी पार्न सफल भइन् ।
युवा खेलाडीमा भने एथ्लेटिक्सका अजितकुमार यादव उत्कृष्ट घोषित भए । भलिबल खेलाडी रेश्मा भण्डारीलाई धेरै फ्यानले मन पराए ।

उनले पिपल्स च्वाइस अवार्ड हात पारिन्। यस अवार्डका लाग क्रिकेटका सन्दीप लामिछाने, ब्याडमिन्टनका प्रिन्स दाहाल, फुटबलकी सावित्रा भण्डारी र शारीरिक सुगठनका महेश्वर महर्जन प्रतिस्पर्धामा थिए ।

वर्षका उत्कृष्ट खेलाडी पुरुष, महिला, पिपल्स च्वाइस र प्रशिक्षकले पल्सर मोटरसाइकल उपहार पाए। अन्य विधाका विजेताले जनही ५० हजार रुपैयाँ प्राप्त गरेका थिए ।