काठमाडौं । पूर्वप्रधानमन्त्री तथा समाजवादी पार्टीका अध्यक्ष डा. बाबुराम भट्टराईलाई पूर्व माओवादीकै नेता कार्यक्रताले साथ छाड्ने क्रम अझै जारी छ ।

शुक्रबार पूर्वमन्त्री तथा समाजवादी की नेतृ कल्पना धमला पार्टी परित्याग गरी सत्तारुढ दल नेपाल कम्युनिष्ट पार्टीमा प्रवेश गरिन् ।

नेकपा केन्द्रीय कार्यालय धुम्बाराहीमा धमलासहितका नेता तथा कार्यक्रतालाई नेकपाका दुई अध्यक्ष केपी शर्मा ओली र पुष्पकमल दाहालले शुक्रबार स्वागत गरे।

संघीय समाजवादी फोरम, नेपाल र नयाँ शक्ति पार्टीबीच एकता भई समाजवादी पार्टी गठन भएको थियो । तर, भट्टराईको उक्त कदमपति भने उनकै नेता कार्यक्रता संतुष्ट छैनन् ।

पूर्वमन्त्री धमलासँगै तत्कालीन नयाँ शक्तिका सचिवालय सदस्य देवेन्द्र पराजुली, केन्द्रीय महिला संगठनकी संयोजक मनु हुमागाँईसमेत नेकपामा प्रवेश गरेका छन् ।

उक्त अवसरमा प्रधानमन्त्री ओलीले सरकारको आलोचना गर्न अनेक प्रयास भइरहेको भन्दै आलोचनाको कडा शब्दमा टिप्पणी गरे ।

अध्यक्ष पुष्पकमल दाहालले भने कम्यूनिष्ट एकताको सन्दर्भमा नेपालमा रहेका सबै नेता एकै स्थानमा आउनु पर्ने बताए ।

उनले त्यसअवस्थामा विप्लवदेखि चित्रबहादुर केसी, नारायणमान विजुच्छेसहितका नेतासमेत नेकपामा अटाउने उनको भनाई थियो ।

उनले पूर्व प्रधानमन्त्री डा. भट्टराईलाई पनि नेकपा भित्रै बसेर  बौद्धिकताको उपयोग गर्न सुझाव दिए ।