न्यूयोर्क 

न्यूयोर्कका ट्याक्सी लगायत सम्पूर्ण भाडाका कार सेवा प्रदायकहरुको नियमनकारी निकाय ट्याक्सी एण्ड लिमोजिन कमिशन (टिएलसी) का डाईरेक्टर माल्कम केनले भेदभावपूर्ण तवरले ग्राहक लिने र नलिने गर्ने ड्राईभरहरुलाई एकदमै कडा कदम चाल्ने भएका छन् ।

यसो त केन आफूसँग अनगिन्ती त्यस्ता तितो घटना स्मृतीमा रहेको बताउँछन् । यद्यपी उनी आफू ६ बर्षको उमेरमा अभिभावकसँग थ्याङ्क्सगिभिङ्स डेको दिन म्यानह्याटन चाईनाटाउनबाट अपटाउन जाने क्रममा आधा दर्जन खाली पहेंलो ट्याक्सीहरूले उनीहरुलाई वर्णकै कारणले चढ्नमा भेदभाव गरी गोरा ग्राहकहरुलाई चढाएको र अन्त्यमा एकजना अश्वेत प्रहरी अधिकृतले ट्याक्सी रोकी घरसम्म जाने व्यवस्था मिलाउनु परेको दुखदायी क्षण स्मरण गर्छन् ।

२७ वर्षका केन यो घटना हप्ताको २/३ पटक सन्धर्वहरुमा सुनाउने गर्दछन् । आफू अफ्रिकन अमेरिकन डाईरेक्टर बनेर काम गर्दैगर्दा कसैले वर्ण, लिङ्ग, जात, पेशा ईत्यादीका आधारमा कसैलाई ट्याक्सीमा चढाउन भेदभाव गरिएको पाईएमा शुन्य सहनसिलता अपनाउने बताएका छन् । 

न्यूयोर्क सिटीको तथ्यांक अनुसार वर्ष २०१८ मा पहेंलो र हरियो ट्याक्सी ड्राईभरहरुले अन-ड्युटीमा रहेर पनि ग्राहक लिन अस्विकार गरेको २२७८ वटा उजुरी परेको थियो, जुन अघिल्लो वर्ष भन्दा १८३४ वटा बढी उजुरी हो । त्यस्तै कार सर्भिसले ४४५ वटा अस्विकार गरेको थियो, जुन अघिल्लो वर्ष भन्दा १०२ बढी हो । यस अनुसार यस्ता घट्ना बढ्दो क्रममा रहेको उनी बताउँछन् ।