काठमाडौं । त्रिभुवन अन्तर्राष्टिय विमानस्थलको धावनमार्गमा यति एयरलाइन्सको जहाज चिप्लएपछि बन्द भएको विमानस्थल ८ घण्टा पछि सूचारु भएको छ ।

त्रिभुवन विमानस्थलमा शुक्रबार बिहान ११ बजे नेपालगन्जबाट आएको जहाज अवतरणका क्रममा धावनमार्गमा चिप्लएको थियो । उक्त घटनामा यात्रु र जहाज भने सकुसल रहे ।

तर, जहाजको पांग्रा हिलोमा भास्सिएपछि बेलैमा जहाज बाहिर निकाल्न सकिएको थिएन । त्रिभुवन विमानस्थल व्यवस्थापनका अनुसार साँझ साढे ६ बजे जहाज बाहिर निकालिएको र साँझ ७ बजेबाट विमानस्थल सूचारु भसकेको छ ।

८ घण्टा विमानस्थल बन्द हुँदा दर्जनौं उडान रद्द भए भने काठमाडौं आउँदै गरेका एक दर्जन भन्दा बढी जहाजको उडान डाइभर्ट गरिएको थियो ।

देशभरबाट हुने सबै आन्तरिक उडान ११ बजेपछि बन्द भएको थियो । देशको एक मात्र विमानस्थल सानो घटनाका कारण पनि बारम्बार बन्द हुने गरेको छ ।

नेपालगन्जबाट काठमाडौं आएको जहाजमा चालक दलका सदस्यसहित ६९ यात्रु सवार थिए ।