समाचार

अब नेपालमा पाइपबाटै तेल

काठमाडौं । नेपाल-भारत क्रस बोर्डर पेट्रोलियम पाइपलाइन संचालनका लागि तयार भएको छ ।

बुधबार पाइपलाइनमा डिजेल हालि सकिएको छ । डिजेल बिहीबार मध्यरात नेपाल आइपुग्ने नेपाल आयल निगमले जानकारी दिएको छ ।

भारतको मोतीहारीदेखि नेपालको अमलेखगन्जसम्म ६९.२ किलोमिटर लामो पाइपलाइनबाट इतिहासमै पहिलोपटक पाइपलाइनबाट तेल आएको हो ।

परीक्षणका रुपमा शुरु भएको यो परियोजना साउन भित्रै पूर्ण क्षमतामा संचालनको तयारी भइरहेको निगमले जानकारी दिएको छ ।

पहिलो पटक एक जहाज लिटर डिजेल पठाएर परीक्षण शुरु गरिएको हो । नेपाल आयल निगम र भारतीय आयल निगमबीच नेपाल-भारत क्रसबोर्डर पेट्रोलियम पाइपलाइन निर्माण गर्न भदौ २०७२ मा औपचारिक सम्झौता भएको थियो ।

पुस २०७४ मा निर्माण शुरु भएको १८ महिना भित्रै पाइपलाइन निर्माण सम्पन्न भएको हो । खासगरी भारतीय आयल निगमकै लगानी र सहयोगमा निर्माण भएका कारण यो आयोजना निर्धारित समयभन्दा झण्डै एक वर्ष अगाडी नै निर्माण सम्पन्न भएको हो ।

कुल ६९.२ किलोमिटर लामो पाइपलाईनमध्ये नेपालतर्फ ३७.२५ र भारततर्फ ३२.६५ किलोमिटर रहेको छ ।

पाइपलाइनमा अब ३६ लाख लिटर तेल मौज्दात रहने छ । यसबाट नेपालको इन्धन मौज्दाद क्षमता पनि बढ्न गएको निगमको भनाई छ ।

अमलेखगन्जमा ठूला ४ वटा ट्यांकी निर्माण गरिएको छ । तेल त्यहीबाट टं्याकरमा भरेर देशभर वितरण हुने भएको छ ।

पाइपलाइनबाट प्रतिघन्टा २ लाख लिटर इन्धन आयातको क्षमता रहेको निगमको भनाई छ ।

यो आयोजना करीव साढे ३ अर्ब भारु लागतमा निर्माण भएको हो ।