काठमाडौं । आईसीसी टी–२० विश्वकप छनोट प्रतियोगिताअन्तर्गत आफ्नो पहिलो खेलमा नेपाल कतारसँग पराजित भएको छ।

सिंगापुरको इन्डियन ग्राउन्डमा मंगलबार बिहान सम्पन्न खेलमा नेपाल कतारसँग ४ विकेटले पराजित भएको हो।

टस जितेर पहिले ब्याटिङ गरेको नेपालले निर्धारित २० ओभरमा सबै विकेट गुमाउँदै मात्र १२२ रन बनाउन सक्यो ।

१२३ रनको विजयी लक्ष्य कतारले १९ दशमलव २ बलमा भेट्टायो। कतारलाई जित दिलाउन इनाम उल हकले विष्फोटक पाली खेल्दै ६ चौकाको मदतले ४१ रन बनाए।

त्यस्तै करिम खानले २२ रन बनाउँदा जाहिर इब्राहिमले १२ रन बनाए। नेपालका लागि सन्दिप लामिछानेले तिन विकेट लिए भने करण केसीले १ विकेट लिए।

कतार विरुद्ध टस जितेर पहिले ब्याटिङ गर्ने नेपालको निर्णय गलत सावित भएको थियो । पहिले ब्याटिङ गरेको नेपालले निर्धारित समयमा सबै विकेट गुमाउँदै मात्र १ सय २२ रन जोड्न सक्यो ।

उत्कृष्ट शुरुवात गरेको नेपालले त्यसलाई निरन्तरता दिन नसक्दा लगातार विकेट गुमायो ।

अन्तिम बलमा अन्तिम विकेट गुमाएको नेपालले सबै विकेट कतारका नाममा सुम्पिएको थियो ।

नेपालका लागि दीपेन्द्रसिह ऐरिले सर्वाधिक ३४ रन जोडे । पारस खड्का र ज्ञानेन्द्र मल्लले २८ र २३ रनको योगदान दिए ।

सोमपाल कामीले ११ रन बनाउनु बाहेक अरु ब्याट्सम्यानले दोहोरो अंकमा रन जोड्न सकेनन् ।

कतारका लागि इकवाल हुसेनले अन्तिम ओभरमा तीन विकेट झारे । नेपालले दोस्रो खेल मलेसियासँग खेल्ने छ ।

अबका सबै खेल नेपालका लागि निर्णायक सरह हो । किनकी एक खेल हार्नासाथ पनि विश्वकप छनोटमा अर्को चरण कठिन हुनेछ ।

प्रतियोगितामा ५ टोलीले भाग लिएका छन् । शीर्ष स्थानमा रहने टोली दोस्रो चरणमा पुग्नेछ ।