काठमाडौं । नेपाल र चीन सरकारबीच द्धिपक्षीय हवाई सेवा सम्झौतामा हस्ताक्षर भएको छ ।

शुक्रबार चीनको बेइजिङमा द्विपक्षीय हवाई सेवा सम्झौतामा हस्ताक्षर भएको पर्यटन मन्त्रालयले जानकारी दिएको छ ।

मन्त्रालयका अनुसार अब चीन र नेपाल दुबै देशका वायु सेवा कम्पनीले एक अर्का मुलुकमा साताको ९८ उडान गर्न पाउने छन् ।

यसअघि यस्तो संख्या ७० थियो । थपिएका २८ उडानमध्ये २१ उडान नेपालमा भैरहवा र पोखरा विमानस्थलका लागि कोटा नै तोकिएको पर्यटन मन्त्रालयले बताएको छ ।

अन्य भने काठमाडौं विमानस्थलमा उडान हुने छ । अहिले चीनबाट ५ वटा वायुसेवा कम्पनीले उडान गरिरहेका छन् ।

उता, चीनमा भने नेपालबाट १५ वटा विमानस्थल उडानका लागि खुला भएका छन् ।

यसअघि ७ विमानस्थलमात्र चीनले नेपाली कम्पनीको उडानका लागि खुला गरेको थियो ।

यससँगै अब नेपाली कम्पनीले चीनका १५ शहरमा उडान बिस्तार गर्न सक्नेछन् ।

अहिले भने कुनै पनि कम्पनीले चीनमा उडान गर्न सकिरहेका छैनन् । चीनले नेपाली कम्पनीका लागि उडान अनुमति नै दिइरहेको छैन ।