काठमाडौं । अब फिल्म हलमा चलचित्र शुरु हुनु अगाडी नेपालको राष्ट्रिय ज्ञान बज्ने भएको छ । सरकारले ‘चलचित्र ऐन, २०७६’को मस्यौदामा उक्त प्रावधान समेटेको छ ।

उक्त विधेयक अब संसदमा दर्ता हुने प्रक्रियामा छ । सूचना तथा संचार प्रविधि मन्त्रालयले तयार पारेको यस विधेयक अनुसार हलमा चलचित्र प्रदर्शन सुरु हुनुअघि अनिवार्य नेपालको राष्ट्रिय ज्ञान बजाउनु पर्नेछ ।

चलचित्र सुरु हुनुअघि तथा मध्यान्तरमा सन्देशमूलक वा शिक्षामूलक श्रव्यदृष्य सामग्री हलले स्कृनमा राख्नुपर्ने व्यवस्था पनि यस विधेयकमा गरिएको छ ।

त्यसो त सरकारले अब म्यूजिक भिडियो र विज्ञापनलाई पनि सेन्सरको दायरामा राख्ने तयारी गरिरहेको छ ।

पछिल्लो समय अस्लिल र छाडा म्यूजिक भिडियोको विगविगी बढ्दै गएको छ ।

टेलिचलचित्र पनि सेन्सर हुनेछन् । चलचित्रको परिभाषा फराकिलो पार्दै सबै प्रकारका छायांकन हुने सामग्रीलाई यस भित्र राखेर सेन्सर गर्न लागिएको हो ।