समाचार

मलेसियाको रोजगारी खुलाउन माग गर्दै व्यवसायी आन्दोलित

काठमाडौं । वैदेशिक रोजगार व्यवसायी आन्दोलनमा उत्रिएका छन् । १४ महिनादेखि बन्द रहेको मलेसिया रोजगारी खुलाउन माग गर्दै व्यवसायी आन्दोलनमा उत्रिएका हुन् ।

मलेसियाको रोजगारी नखुलाए व्यवसायको लाइसेन्स नै सरकारको जिम्मा लगाउने चेतावनी उनीहरुले दिएका छन् ।

व्यवसायी मंगलबार वैदेशिक रोजगार विभागमा शान्तिपूर्ण धर्नामा उपस्थित थिए ।

म्यानपावर व्यवसायीको सबैभन्दा ठूलो आम्दानीको स्रोत नै मलेसिया हो । मलेसिया बन्द भएपछि व्यवसाय संकटमा रहेको उनीहरुको गुनासो छ ।

नेपालबाट सबैभन्दा धेरै नेपालीको गन्तब्य रहेको मलेसिया पठाउने सिलसिलामा कामदार ठगिने गरेको प्रमाणित भएपछि सरकारले मलेसियाको गन्तब्य बन्द गरेको थियो ।

त्यसपछि मलेसिया र नेपाल सरकारबीच सम्झौता भएपनि पुनः रोजगारी शुरु हुन सकेको छैन ।

सरकारले मलेसियाको सम्झौता समेत सार्वजनिक नगरेको भन्दै व्यवसायीले विरोध गर्दै आएका छन् । नेपालीहरु जेठ २०७५ पछि मलेसियाको रोजगारी बन्द भएको छ ।