काठमाडौं । झापाको दमकमा औद्योगिक पार्क निर्माण गर्न लगानी बोर्डले लगानी स्वीकृत गरेको छ । बोर्डका अनुसार यो परियोजनाको लागत ६४ अर्ब रुपैयाँ रहेको छ ।

चीन–नेपाल फ्रेण्डसीप औद्योगिक पार्क निर्माण हुन लागेको हो । स्वीकृत भएको यो लगानी कार्यान्वयनमा आउँदा सम्भवतः अहिलेसम्मकै ठूलो विदेशी लगानी हुनेछ ।

प्रधानमन्त्री केपी शर्मा ओलीको अध्यक्षतामा शुक्रबार बसेको बैठकले उक्त लगानी स्वीकृत गरेको हो । संयोगले यो परियोजना प्रधानमन्त्रीकै जिल्लामा बन्ने भएको हो ।

परियोजनामा ल्हासा इकोनोमिक एण्ड टेक्नोलोजी डेभलपमेण्ट जोन जीङ–पिङ जोइन्ट क्रियसन कन्स्ट्रक्सन प्रोजेक्ट डेभलपमेण्ट प्रालिले लगानी गर्ने बोर्डले उल्लेख गरेको छ ।

लगानी बोर्डले परियोजनाको विस्तृत परियोजना प्रतिवेदन तयार पार्ने जिम्मा दमक क्लिन इन्डस्ट्रीयल पार्कलाई दिएको छ ।

शुक्रबार बसेको बोर्डको ३९ औं बैठकले बिराटनगरमा निर्माण तथा संचालनको प्रस्ताव गरिएको मल्टी मोडेल लजिस्टिक पार्क परियोजना स्वीकृत गरेको छ ।

जनकपुरमा निर्माण तथा संचालन गर्न प्रस्तावित रेल्वे लिंक्ड प्राइभेट फ्रेट टर्मीनल परियोजना समेत लगानी बोर्डले स्वीकृत गरेको छ । यसको अध्ययन ग्रीन इन्फ्रास्टक्चर प्रालिले गर्ने भएको छ ।