काठमाडौं । नेपाल एयरलाइन्सले दूर्गम पहाडी तथा हिमाली भेगका विमानस्थलमा परीक्षण उडान शुरु गरेको छ ।

निगमको वाई१२इ जहाजबाट धमाधम परीक्षण उडान भइरहेको निगमले जानकारी दिएको छ । पर्यटन वर्ष २०२० का लागि सहयोग पु¥याउन भन्दै निगमले आफ्नो सक्रियता बढाएको उल्लेख गरेको छ ।

निगमले आन्तरिक उडान सुदृढ बनाउने लक्ष्यसहित साउन १८ मा चौरजहारी विमानस्थल र ताप्लेजुङ्गको सुकेटार विमानस्थलमा सफल परीक्षण उडान गरेको छ ।

साउन १९ मा रुकुममा परीक्षण उडान गरेको निगमले २० मा भोजपुर उडाउने तयारी गरेको छ । साउन २१ र २२ मा बाजुरा र तुम्लिङ्गटारमा वाई१२ई विमानबाट परीक्षण उडान गरिने निगमको तालीका छ ।

अधिकतम क्षेत्रमा आन्तरिक उडान गर्ने व्यवस्था गरी निगमले पर्यटन प्रर्वद्धनमा थप योगदान पु¥याउने लक्ष्य लिएको निगमले उल्लेख गरेको छ ।

निगमसँग यस्ता साना जहाज ४ वटा छन् । यो चीनमा बनेको जहाज हो । एक पटकमा १७ जना बोक्ने क्षमता रहेको यो जहाज छोटो धावनमार्ग रहेको विमानस्थलमा सजिलै उडान अवतरण गर्न सम्भव हुन्छ ।