काठमाडौं । नेपाल विद्युत प्राधिकरणले इतिहासमै सबैभन्दा ठूलो आर्थिक वृद्धि हाँसिल गर्न सफल भएको छ ।

कार्यकारी निर्देशक कुलमान घिसिङको कूशल व्यवस्थापनमा प्राधिकरणले निरन्तर सकारात्मक नतिजा निकाल्न सफल भएको हो ।

लोडसेडिङ अन्त्य भएपछिको एक वर्ष अवधिमा प्राधिकरणको नाफा ७ अर्ब २० करोड पुगेको छ । अहिले प्राधिकरण जलविद्युत आयोजनाको निर्माण सक्ने र प्रसारण क्षमता बढाउने काममा व्यस्त छ ।

त्यसो त प्राधिकरणले एक वर्षको अवधिमा चुवावट नियन्त्रणमा ठूलो सफलता प्राप्त गरेको छ । त्यसको सकारात्मक प्रभाव मुनाफामा देखिएको हो ।

उर्जा, जलस्रोत तथा सिञ्चाई मन्त्रालयमा मंगलबार पत्रकार सम्मेलन गरी मन्त्रालयको वार्षिक प्रगति सार्वजनिक गरियो ।

सोही अवसरमा प्राधिकरणको आर्थिक अवस्थासमेत सार्वजनिक गरिएको हो । कुलमानले नेतृत्व थालेपछि प्राधिकरण नाफामा जान लागेको हो ।

त्यसअघि प्राधिकरण निरन्तर घाटामा थियो । उनी भदौ २०७३ मा प्राधिकरणको नेतृत्वमा आएका हुन् । उक्त वर्ष वार्षिक ८ अर्ब ८९ करोड घाटामा रहेको प्राधिकरणलाई कुलमानले घाटा पूर्ति गरेर उच्च मुनाफामा लगेका छन् ।

यस वर्ष चुवाहट नियन्त्रणमा सफल भएका कारण मुनाफामा समेत ठूलो फाइदा भएको प्राधिकरणको भनाई रहेको छ ।

अहिले राष्ट्रिय प्रसारणमा आवद्ध भई विद्युत उपभोग गर्ने जनसंख्या ७८ प्रतिशत पुगेको छ ।

अघिल्लो आव ०७४\७५को तुलनामा १० प्रतिशत बढी जनसंख्यामा विद्युत सेवा बिस्तार भएको मन्त्रालयको तथ्यांकमा उल्लेख छ ।