डायस्पोरा

न्यूयोर्कमा टुटुल्को डटकमको गाईजात्रा सम्पन्न

न्यूयोर्क,

गत १७ तारिख शनिबार, परंपरागत गाईजात्राको अवसर पारेर टुटुल्को डटकमले न्यूयोर्क शहरमा पहिलो पटक हास्यब्यंग्यात्मक गाईजात्रा कार्यक्रम सम्पन्न गरेको छ । प्रबेश शुल्क २० डलर तोकिएको कार्यक्रम क्विन्सको नर्दन बुल्भर्डस्थित पब्लिक लाईब्रेरीमा तोकिएको समयमा शुरु भएको थियो ।

खासगरी राजधानी उपत्यका र आसपासका नेवार समुदायले प्रत्येक बर्ष आफ्नो परिवारका दिवंगत हुने आफन्तको संस्मरणमा मृतआत्मा शान्तीका लागि झॉकी सहित मनाईने पौराणिक पर्वको रुपमा मनाईने “गाईजात्रा” को प्रतीकको रुपमा टुटुल्को डटकमले आयोजना गरेको हो ।

पट्यारलाग्दो भाषण, मञ्चासन, खादा, सम्मानको लाईनले वाक्क दिक्क भएका दर्शकहरुका लागि यस्ता खालका बिशुद्ध मनोरञ्जनात्मक कार्यक्रमले खुसी थपेका थिए । त्यसका अलावा तोकिएको समयमा कार्यक्रम शुरु गर्न नसक्ने विगतका अन्य आयोजकहरुलाई गाईजात्रे जवाफ दिने प्रयास पनि गरिएको देखिन्थ्यो । कार्यक्रम संचारकर्मीत्रय शैलेश श्रेष्ठ, सच्ची मैनाली र टुटुल्को डटकमका संचालक ज्योतिकुमार श्रेष्ठले पालैपालो सञ्चालन गरेका थिए ।

कलाकारहरु राम श्रेष्ठ, अभय ढुंगेल, न्हुच्छे नारायण डंगोल, पुजा न्यौपाने, संगिता मुखिया छोचु, बिमल डाँगी, केशव दाहाल लगायतका गायकगायिकाहरुको जोडदार प्रस्तुती रहेको थियो । संगिता उप्रेतीको प्यारोडी र्यापमा बालकलाकारहरु श्रीनिती रिजाल, सलज रिजाल, अष्टिन आचार्यको सानदार नृत्य, तराईवासीको भूमिकामा दिपेन श्रेष्ठ, अर्जुन दाहाल र सच्ची मैनालीको पत्रकार र पत्रुकारका बीचको परिभाषिक प्रहसन, बिमल डॉगीका व्यंग्यात्मक प्यारोडी, न्यूयोर्कस्थित बसन्त डान्स सेन्टरका नृत्य प्रशिक्षक बिजय नकर्मीको कोरियोग्राफीमा बाउले विहे गर्देनन् पोर पनि… गीतमा राम पन्त, योगेश आदी र कृश थापाको रमाईलो कमेडी नृत्य र भक्तपुरको परंपरागत घिन्ताङ् घिस्सी लट्ठी नृत्यमा १३ जना केटाकेटीहरूलाई प्रशिक्षक नकर्मीले स्टेजमा उतारेका थिए । गजलकार आनन्द श्रेष्ठको नौलो प्रस्तुति, कानूनबिद बिनोद रोकाको हास्यरसका कबिता बाचन रमाईलो थियो । त्यसैगरी एनआरएनमा लागेका नेताहरुको परिवार भित्रका यथार्थ चित्रण व्यंग्य मार्फत नदिया लिवाङ र संगीता उप्रेतीद्वयको प्रस्तुतीलाई दर्शकले धेरै नै रुचाएका देखिन्थ्यो । कलाकारद्वयको अभिनयले दर्शकहरू हांस्दाहांस्दै एकैछिनपछि भावुक भएका थिए । समाजका नकारात्मक पक्षको कुराहरुलाई ब्यङ्ग्यात्मक शैलीमा प्रस्तुत गरिएको लघुनाटकले माटो र मनको भावनालाई मार्मिक ढंगले प्रस्तुत गरिएको थियो ।

कार्यक्रम संयोजनमा अजय छोचु, किसन धामी, लक्ष्मी श्रेष्ठ, डिजे जाङ्बु, श्रृजन श्रेष्ठ, क्यामेरापर्सन अशोक पन्त, राजेश श्रेष्ठ लगायतको सकृयता रहेको थियो । कार्यक्रम प्रमुख ज्योतिकुमार श्रेष्ठले पहिलो पटकको प्रयास सफल भएको र आगामी दिनमा पनि यस्तो रमाईलो, रोचक र घोचक कार्यक्रम आगामी वर्षहरुमा पनि गर्न सकिने बताउनु भयो ।