काठमाडौं । अत्यधिक मादक पदार्थ सेवन गरी जहाज चढेको भन्दै सिल्क एयरले गैरआवासीय नेपाली संघका अध्यक्ष भवन भट्लाई जहाजबाटै फिर्ता पठाइदिएको छ ।

शनिबार राती काठमाडौंबाट सिंगापुर जाने तयारीमा रहेका भट्ट र उनका सहयोगी सनत न्यौपानेलाई एयरलाइन्सले यात्रामा रोक लगाएको हो ।

उनी सिंगापुरमा उपचारार्थ रहेका प्रधानमन्त्री केपी शर्मा ओलीलाई भेट्न सिंगापुर जान लागेको बताइएको छ ।

उनका सहयोगी सनत न्यौपानेले फेसबुक लाइभबाटै प्रधानमन्त्रीलाई भेट्न सिंगापुर जान लागेको बताएका छन् ।

शनिबार दिउसभर विजेनेश बैठकहरुमा सहभागी हुने क्रममा मादक पदार्थ सेवन गरेको समेत उनले स्वीकार गरेका छन् ।

विमानस्थ्लको सबै प्रक्रिया पुरा गरी जहाजमा उड्न तयार रहेको अवस्थामा भट्ट र न्यौपानेलाई जहाजका पाइलटले ओर्लन आदेश दिएको बताइएको छ ।

संसारभर मादक पदार्थ सेवनका कारण यात्रुलाई कम्पनीले उडानमा रोक लगाउने प्रचलन हुन्छ । यस्तो काण्डमा बढीजसो सेलिब्रटी फसिने गरेका छन् ।

किनकी उनीहरु शक्ति प्रदर्शनको घमण्ड विमानस्थलका कर्मचारीसमक्ष देखाउने गर्छन् ।