केपी भट्ट/ कनेक्टिकट 

गत मे महिनामा सम्पन्न NRNA अमेरिकाको निर्वाचनबाट निर्वाचित नयाँ नेतृत्वले गत जुलाईमा पदभार ग्रहण गरेसँगै विभिन्न च्याप्टरमा पनि नयाँ नेतृत्वको पद हस्तान्तरण  कार्यक्रम चलिरहेको छ । यसै क्रममा कनेक्टिकट च्याप्टरले एक कार्यक्रमको आयोजना गरि पद हस्तान्तरण सम्पन्न गरेको छ । गत अगष्ट २६ तारिक आईतबार आधिकारिक रुपमा उक्त कार्यक्रम गरिएको हो । एनआरएन कनेक्टिकट च्याप्टरका निबर्तमान अध्यक्ष श्री घनश्याम खड़काको सभापतित्वमा भएको सो कार्यक्रमका प्रमुख अतिथि एनआरएन अमेरिकाका उपाध्यक्ष तथा उत्तर पुर्वि क्षेत्रीय समितिको सभापति श्री बाबुराम लामा हुनुहुन्थ्यो भने एनआरएन न्युयोर्क च्याप्टरका अध्यक्ष एवं उत्तर पुर्वी क्षेत्रीय समितिको सचिब श्री रामहरि अधिकारी, हामी नेपाली ग्लोबल संस्थाका ग्लोबल अध्यक्ष श्री अमृत लामा लगायत विभिन्न स्थानीय संघ सस्थाहरुबाट पाल्नु भएका अतिथिहरुको  बाक्लो उपस्थिति रहेको थियो । 

कार्यक्रममा नवनिवाचित अध्यक्षलाई पद हस्तान्तरण गराऊनुको साथै च्याप्टरका नयाँ कार्यसमितिका सबै एघार जना पदाधिकारीहरुलाई प्रमुख अतिथिबाट सपथ ग्रहण गराईएको थियो । त्यसैगरी सबै पदाधिकारीहरुलाई आ-आफ्नो ओहोदाको प्रमाणपत्रहरु पनि प्रदान गरिएको थियो।

आगामी (2019-2021) कार्यकाल  लागि भएको चुनावमा कनेक्टिकट च्याप्टरको नेतृत्वको लागि निर्वाचित भएका अध्यक्षमा हरि प्रसाद जोशी लगायत च्याप्टरको कार्यसमितिको उपाध्यक्षमा मुना तिवारी,  सचिबमा केपी भट्ट , कोषाध्यक्षमा नारायण दत्त मिश्र, महिला संयोजकमा शुशिला कार्की, युवा संयोजकमा यज्ञ राज जोशी सहित बोर्ड सदस्यहरुमा नमुना अयार्ल , सुनिता चापागाईं पाण्डे,  हरि पन्थ, श्याम बाबू कार्की र बिजेन्द्र बहादुर  मल्ल चयन हुनु भएको छ । 

कार्यक्रममा प्रमुख अतिथि लामा, एनआरएन न्युयोक च्यापटरका अध्यक्ष रामहरि अधिकारी, हामी नेपाली ग्लोबलका अध्यक्ष अमृत लामा, एनआरएन कनेक्टिकट च्यापटरका संस्थापक अध्यक्ष एवं च्याप्टरका प्रमुख सल्लाहकार राम ओझा, हार्टफोर्ड काउन्टी एभरेस्ट सेन्टिनियल लायन्स क्लबका अध्यक्ष माधव आत्रेय, जनसम्पर्क समिति कनेक्टिकट च्यापटरका सभापति यादव दुलाल, नेपालिज एसोसिएसन अफ कनेक्टिकट (नेकोन) का प्रमुख सल्लाहकार अशोक श्रीवास्तब लगायत अतिथिहरु एवम् स्थानीय संघ संस्थाका प्रतिनिधिहरुले शुभकामना मन्तब्य राख्दै एनआरएन कनेक्टिकट च्यापटरका नयाँ कार्यसमितिलाई हार्दिक बधाई एवम सफल कार्यकालको शुभकामना ब्यक्त गर्नुभएको थियो ।

त्यसैगरी कार्यक्रममा उपस्थित हुन असमर्थ हुनुभएका विभिन्न संघ सस्थाका अध्यक्षहरुबाट आ- आफ्नो सस्थाको तर्फबाट  नयाँ कार्यसमितिलाई पठाईएको बधाई एवं कार्यकाल सफलताको शुभकामना सन्देश पढेर सुनाईएको थियो । शुभकामना सन्देश पठाउनेहरुमा सोसाइटी अफ नेपालिज इन अमेरिका (एस एन ए ), एन आर एन म्यासाचुसेट्स च्याप्टर, न्यु ह्याम्पसायर च्याप्टर,  न्यु जर्सी च्याप्टरका अध्यक्षहरु एवम् आई सि सि मेम्बर तृष्णा शर्मा काफ्ले हुनुहुन्थ्यो । उक्त पद हस्तान्तरण कार्यक्रमका दोस्रो चरणमा कार्यक्रमको सभापतित्व ग्रहण गर्नु भएका नव निर्वाचित अध्यक्ष हरि प्रसाद जोशीले उपस्थित सबै गन्यमान्य सदस्यहरु एवं महानुभावहरुलाई धन्यवाद दिदै कार्यक्रमको समापन गरिएको थियो ।