काठमाडौं । काठमाडौं महानगरपालिकाले जीवित देवी कुमारीको मासिक भत्ता बढाएको छ ।

यसअघि २५ हजार रुपैयाँ मासिक दिँदै आएकोमा अब शतप्रतिशत बढाएर ५० हजार पर्याइएको महानगरपालिकाले जानकारी दिएको छ ।

आइतबार राजधानीमा एक कार्यक्रम आयोजना गरी मेयर विद्यासुन्दर शाक्यले कुमारीको मासिक भत्ता बढाउने घोषणा गरेका हुन् ।

पूर्वकुमारीले मासिक १५ र पूर्व गणेश र पूर्व भैरवले १२–१२ हजार प्राप्त गर्नेसमेत कार्यक्रममा जानकारी गराइयो । चिताइदारको पनि मासिक भत्ता ५० हजार पुर्याइएको छ भने पूर्वचिताइदारले मासिक १५ हजार पाउने भएका छन् ।

उनीहरुको यसअघिको रकम ८\८ हजार रुपैयाँ रहेको थियो । सोही कार्यक्रममा काठमाडौँ महानगरपालिकाले ईन्द्रजात्रा व्यवस्थापन समितिलाई १३ लाख ९३ हजार सात सय रुपैयाँको चेक दिएको छ ।

इन्द्रजात्रालाई नेपालको पहिचानका रुपमा स्थापित गर्न विभिन्न मुलुकबाट विशिष्ट पाहुनाहरुसमेत बोलाउने तयारी गरिएको छ । काठमाडौं उपत्यका सांस्कृतिक विशेषताका कारण पनि विश्वभर परिचित शहर हो ।