काठमाडौं । प्रधानमन्त्री केपी शर्मा ओली स्वदेश फर्किएका छन । सिंगापुरमा स्वास्थ्य उपचार गरी प्रधानमन्त्री शुक्रबार बिहान स्वदेश फर्किएका हुन् ।

प्रधानमन्त्रीको स्वागतका लागि विमानस्थलमा सभामुख कृष्णबहादुर महरा, उपप्रधान तथा रक्षामन्त्री ईश्वर पोखरेलसहित मन्त्रीहरु पुगेका थिए ।

विमानस्थलमा प्रधानमन्त्री संचारकर्मीसँग बोल्न भने मानेनन् । उनी ५ भदौमा उपचारको सिलसिलामा सिंगापुर गएका थिए ।

त्यसअघि १० दिन उपचार गरी उनी स्वदेश फर्किएका थिए । प्रधानमन्त्रीका निजी चिकित्सकहरुका अनुसार प्रधानमन्त्री तन्दुरुस्त बनेर स्वदेश फर्किएका छन् ।

उनी अब नियमित काम गर्न सक्छन् । यसैबीच नेकपा अध्यक्ष प्रचण्डले शुक्रबार नै प्रधानमन्त्री केपी शर्मा ओलीलाई भेटी उनको स्वास्थ्य अवस्थाबारे जानकारी लिएका छन् ।

सिंगापुरमा रहेका बेला प्रधानमन्त्रीले दुई पटकसम्म भिडियो कन्फ्रेन्स गरी नेपालको हालखबर बुझेका थिए ।